No ta kumbiní pa e hòmber ta su so

E hòmber solitario ta karesé di humanidat pasobra e hòmber so ta manera un mata solitario na kua falta el rumor di mondi.
Dios a krea e hòmber promé i despues e muhé? E no a krea nan dos mas bien di un bia? E teksto di Génesis mas ku e proseso di kreashon, ta un manera di splika nos ku hòmber i muhé ta komplementá otro, hòmber i muhé mester di otro, hòmber i muhé, siendo diferente, ta terminá siendo un so.

Ta p’esei e atraktivo ku e hòmber ta sinti pa e muhé i e muhé pa e hòmber ta e forsanan mas profundo di nan kurason, di ta riba e amor familiar, di ta riba e amor fraternal. “P’esei un hòmber lo laga su tata i su mama pa uni ku su kasá i nan dos lo ta un.”
Ta p’esei mes, matrimonio ta hundi su raisnan den naturalesa mes di e hòmber i muhé. Ora Dios a krea nan ainda no tabata eksistí e sakramento di matrimonio, pero tabata eksistí e amor ku no por kibra. E berdadero indisolubilidat ta nase di e naturalesa maskulino i femenino i di e amor maskulino i femenino. Mas despues, e sakramento lo ofresé nan eksigensianan i dimenshonnan nobo, pero matrimonio ta algu ku no por kibra promé ku e sakramento.

Ta p’esei mes, ora nan ta trese e problema di divorsio serka Hesus, E no ta akudí na e sakramento ku lo nase di e misterio Paskual, E ta akudí na e sakramento natural di kreashon: “Na prinsipio no tabata asina…” Dios no a inventá matrimonio p’asina ku despues ta eksistí divorsio.
Ta posibel ku un di e kousanan di tantu mentalidat divorsista aktual ta bini presisamente di aki, ta konfundí divorsio ku sakramento. I klaru, nos a devaluá tantu e matrimonio kreashonal ku nos ta mir’é komo algu ku por kibra ora nos ta haña ta bon. Komo nos fe sakramental ta pober, e no tin sufisiente forsa pa mantené nan “te ora morto separá nan”. Ku ki fasilidat nos ta bisa: komo ku e tabata kasá solamente pa sivil, awor e por kasa pa Iglesia! Nos lo no ta papiando di dos matrimonio diferente?

Ta nesesario bolbe evaluá e forsa sakramental. Di esaki nos ta sigur. Esaki ta dependé ya di fe, pero promé nos tin ku bolbe evaluá e matrimonio kreashonal ku Dios no a krea komo un wega di hende ku no a madurá ku por disidí manera nos ta haña ta bon. Grasia no ta supla ni ta destruí naturalesa, sino ku e ta dun’é sentido i fortalesa.