No presiona ningun hende pa vacuna

ORANJESTAD-Ayera mainta for di prome ora por a mira un grupo di hende banda di Ritz Carlton ta manifesta contra di e vacuna. Polis a atende cu e grupo aki teniendo nan riba un distancia di e vacunathon.

Ta varios hende cu a bin demostra cu nan tin derecho. Combersando cu algun di nan, ta menciona cu nan no ta contra esnan cu kier vacuna, cada ken tin nan derecho. Pero nan ta para p’esnan cu ta sinti nan obliga pa vacuna, e.o. dor di nan dunador di trabao. Ta imposibel kere cu e grupo cu no kier vacuna, ta motibo cu Gobierno aki kier ta culpa nan y pesey ta bin cu medida.

Ningun compania no mag di dicta riba nan trahadornan cu nan mester vacuna. Gobierno t’ey pa proteha e hendenan den un espacio di trabao. Ta bisando cu companianan mag haci kico nan kier.

Gobierno tabatin un aña of mas pa termina e hospital, pero no y awe nos mester manda hende Colombia pa busca nan salud.

E grupo cu a bin manifesta ta sostene otro y nan no a haci ningun propaganda. Y a indica cu nan no ta aglomerando, compara cu e rij largo cu tin pa warda pa vacuna. E grupo no kier ningun violencia y no ta busca problema tampoco. No presiona ningun hende pa vacuna, tabata e.o. nan grito.