No bai Ulanda parotin keriendo ku haña kas sosial ta fasil

DEN HAAG. Si mas Yu’i Kòrsou ku kier a bai of a bai Ulanda a lesa e eksperensia di Gwendolyn (riba foto ku su yu), ta masha dudoso ku nan lo a inisia e eksperimento duru i fastioso pa sin manera pa paga alkiler, haña un kas desente na Ulanda. Pasobra si nan haña kas mes den e skarsedat ku ta reina riba merkado, no ta kos di kanta makamba.
E siguiente kaso ta ilustrá e situashon i por sirbi pa hendenan ku den e aktual krisis na Kòrsou tin intenshon di emigrá bai Ulanda, pensa dies biaha pasobra no tin banda musikal ta spera nos hendenan na Ulanda pasobra ni pa nan mes no tin banda musikal.
Nos ta ilustra e kaso di señora XX kende na aña 2019 a pidi munisipio di Den Haag pa haña un deklarashon di preferensia na momento di haña kas pero munisipio a ninga di duna e deklarashon.
Ela bai korte i ta resientemente numa korte a tuma un desishon i no a duné rason.
Ela bai Ulanda for di yuli 2018 ku dos yu muhé menor di edat pa buska trabou i haña un bon skol pa su yunan.
Primeramente nan a bai biba serka un konosí na Den Haag i despues a bai keda serka un otro yu muhé kende ta biba den un kas pa un persona na Den Haag. Un di su yunan menor di edat tabata biba kune pasobra e no por a haña un apartamento desente ku e por a paga.
Biba den kas chikitu a hasié malu pero pió ta ku su yu menor di edat tambe a bira malu i einan kaminda di krus a kuminsa di bai sikologo.
Esei a pone ku señora XX a pidi un deklarashon di preferensia komo hende ku ta buska kas i a produsi deklarashon di un trahadó sosial pidiendo komprenshon pa señora XX.
E instansia ku ta duna kas a ninga di duné un kas riba kual ela apelá e desishon. Entre yuli 2018 te november 2019 e tribunal a trata e kaso sinku biaha!!
Mientras tantu e síntomanan dje yu muhé menor di edat a kuminsa bira mas grave pasobra ela haña ansiedat, na kas e no tin un lugá trankil pa su mes i no por traha su huiswerk loke na su turno ta resulta den problema na skol.
Abogado dje señora a pidi pa resolvé e situashon mas pronto posibel.
Gobiernu munisipal a reklamá e señora ta dikon ela bin Ulanda ku su dos yunan sin a regla kas promé pasobra e por a konta ku dia e bai biba serka su yu muhé, esei lo a kousa problema.
Ta e mes a kousa e problema i gobiernu munisipal a bisé flèt ku nan no ta sigi atendé e kaso.
Korte tambe a bisa ku ta e señora mes ta responsabel pa e situashon ku e ta aden pasobra e no a regla kas promé ku ela manda buska su yunan.
E argumento ku e ta traha na Den Haag i ku su yunan ta bai skol na Den Haag no ta motibu valido pa duné kas.
Uniko argumento ku señora XX tabatin ta ku e tabata di buena fe i a kere ku gobiernu ta regla tur kos pa emigrante na Ulanda. Ela ripiti henter e historia kon ela hañ’é na kas dje yu muhé, ku nan a bira malu den e kas i tin tenshon.
Tampoko e tabata sa ku no ta sin mas ta kana drenta haña kas pasobra tin tempu di espera.
Summa summarum, awor su situashon ta mas desespera ku nunka pasobra e no tin trabou i ta dependé di Bijstand.
Nan a splika e señora ku si e mester di kas urgentemente no ta sufisiente pa e haña kas.
Un dje kondishonnan pa haña un deklarashon di preferensia ta ku no ta su falta ku e no tin kaminda pa keda. E hecho ku e tabatin trabou na Den Haag i ku ta p’esei ela muda bai Den Haag tampoko ta motibu valido.
Funshonarionan a mustr’é riba tur e puntonan aki i no a keda otro solushon di warda i biba riba sèn di Bijstand.