Ningun pista ainda di asesino ku a likidá Remsley Eisden

DORDRECHT. Foi djadumingu te den oranan grandi di marduga spesialistanan polisial di Dordrecht a keda buská pa pista ku por kondusi nan, na e pistolero of pistoleronan ku a tira Eisden mata.
Nan a listra delaster sentimeter di e sentro komersial Crabbenhof di punta pa punta despues ku e denunsia a yega ku tabatin un persona morto den un outo den Van den Tempelhof.
Polis a identifiká e Kurasoleño Eisden mesora i nan tabatin tur detaye di su persona. E tabatin 36 aña, dia nan a likidé.
E likidashon a tuma luga den kareda di mitar di un’or di marduga grandi den Tempelstraat kaminda nan a lòs varios tiru.
Polis i personal di ambulans a yega rapidamente pero tabata envano. Ora nan a yega na e sitio, ela muri kaba pasobra ta ku ráfaga di bala nan a likidé. Polis a pone un tim di 20 reshershe riba e kaso i notabel ta ku nan a revelá nomber dje viktima asina lihé pasobra normalmente nan ta hasi masha misterioso pa duna nomber di viktima. Den e kaso aki konsientemene nan a duna e nomber pasobra nan ke haña kontakto ku hende ku tabata ku e viktima ultimo dia di su bida pa nan traha un panorama dje dia ei.
Un dje medidanan ku alkalde dje siudat a tuma ta pa sera e shap ku tin kaminda e asesinato a tuma luga na Dodrecht.