Ningun hende tin lo eksklusivo di Hesus

E esena ta sorprendente. E disipelnan ta aserká Hesus ku un problema. E bia aki, e portadó di e grupo no ta Pedro, sino Huan, un di e dos rumannan ku ta kana buskando e promé puestonan. Awor nan ta pretendé ku e grupo di disipelnan tin lo eksklusivo di Hesus i e monopolio di su akshon liberadó.
Nan ta bin preokupá. Un eksorsista, no integrá den e grupo, ta sakando demoñonan den nòmber di Hesus. E disipelnan no ta alegrá di ku hende ta keda kurá i por inisiá un bida mas humano. Nan ta pensa únikamente den e prestigio di nan propio grupo. Ta p’esei , nan a trata di kòrta su aktuashon den rais. Esaki ta nan úniko rason: “e no ta di nos”.
E disipelnan ta bisa por supuesto ku, pa aktua den nòmber di Hesus i ku su forsa kuradó, ta nesesario ser miembro di nan grupo. Ningun hende por apelá na Hesus i traha pa un mundu mas humano, sin forma parti di Iglesia. E ta realmente asina? Kiko Hesus ta pensa?
Su promé palabranan ta masha kla: “No strob’é”. E Nòmber di Hesus i su forsa humanisadó ta mas importante ku e grupo chikí di su disipelnan. Ta bon ku e salbashon ku Hesus ta trese ta ekstendé mas ayá di e Iglesia establesí i ta yuda hendenan pa biba di manera mas humano. Ningun hende tin ku mir’é komo un kompetensia no leal.
Hesus ta kibra tur tentashon sektario den su siguidónan. E no a konstituí su grupo pa kontrolá su salbashon mesiániko. E no ta rabi di un skol será sino Profeta di un salbashon habrí pa tur hende. Su Iglesia tin di apoyá su Nòmber ei kaminda e ta invoká pa hasi bon.
Hesus no ke pa entre su siguidónan ta papia di esnan ku ta di nos i di esnan ku no ta, esnan di paden i esnan pafó, esnan ku por aktua den su nòmber i esnan ku no por hasié. Su moda di mira kosnan ta diferente: “Esun ku no ta kontra di nos ta na nos fabor “.
Den e sosiedat moderno tin hòmber i muhé ku ta traha pa un mundu mas hustu i humano sin ta pertenesé na Iglesia. Algun di nan no ta kreyente, pero nan ta habriendo kamindanan pa e reino di Dios i su hustisia. Nan ta di nos. Nos mester alegrá nos mes na lugá di mira nan ku resentimentu. Nos tin ku apoyá nan na lugá di deskualifiká nan.
Ta un eror biba den Iglesia mirando den tur parti hostilidat i maldat, keriendo ku únikamente nos ta portadónan di e Spiritu de Hesus. E lo no aprobá esaki di nos. E lo invitá nos pa kolaborá ku alegria ku tur esnan ku ta biba di manera evangéliko i ta preokupá nan mes pa esnan mas pober i den nesesidat.