Nicolás Maduro a anunsiá apertura total di frontera ku Colombia

CARACAS – Nicolás Maduro a anunsiá ayera ku pa entrante 1 di yanüari 2023 frontera entre Venezuela i Colombia lo habri pa tur tipo di vehíkulo.
Manera ta konosí kaba frontera entre Colombia i Venezuela a keda sera na luna di òktober di aña 2015. Ne momentunan aki tin solamente konekshon aéreo entre Venezuela i Colombia ku ta un avanse sumamente positivo segun presidente Nicolas Maduro.
Pa aworakí tin tres kompania di aviashon ku ta kubri e ruta Caracas/Bogota ku ta Satena (Colombia) i Turpial i Laser.
Entre otro kompanianan di aviashon ku a solisitá pa pèrmit pa bula entre Bogota i Caracas ta Latam i Wingo. Nicolas Maduro a bisa ku pa regalo di aña nobo e pueblo venesolano lo por krusa frontera ku trùk, outo i motersaikel i lo por kuminsá hasi komersio tambe si esaki ta posibel.