Nan a tumba e 4 biaha kampeon di Mundu Alemania 2-1: …Milager Hapones…

E selekshon di Hapon awe den e mundial di Qatar den wega bálido pa Grupo E a perkurá pa otro sorpresa grandi ora ku nan a tumba e selekshon 4 biaha kampeon di Mundu ku ta Alemania ku skor di 2-1.

Despues ku djamars Arabia Saudita a perkurá pa sorpresa grandi ganando di Argentina, awe e selekshon Hapones a perkurá pa otro triunfo sorprendente den e mundial di Qatar.

Alemania a pika dilanti den e wega ku gol di Ilkay Gundogan i tabatin oportunidat di amplia e markadó pero nan no a logra danki na tremendo trabou dje portero di Hapon.

Tabata Ritsu Doan ku a empatá e wega na di 75 minit i Takuma Asano ku ta skor na di 83 minüt pa duna e selekshon hapones e triunfo milagroso aki di 2-1.

Hapon i Alemania huntu ku Costa Rica i Spaña ta forma parti di Grupo E.
· Den e wega di mainta ku serka nos a hunga 6or e selekshon di Marocco i Croatia a tabla 0-0.

Wega bálido pa Grupo F.
· 12or lo mester hunga: Spaña vs Costa Rica.
· 3or: Belgika vs Canada den Grupo F.