Nan a regresá ayera: Kampeon (nan) di Karibe bek na Kòrsou.. I kla pa Williamsport..

E selekshon di baseball Liga Pabou ku a bira kampeon di Karibe den e kompetensia ku a tuma lugá na e siudat di Punta Cana, Repúblika Dominikana a regresá Kòrsou ayera. Nos muchanan bou di direkshon di Zaino Everitt a gana e kompetensia invikto derotando e fuerte representashon di Cuba den e final.
Un ratu promé Liga Pabou a kita Liga Pariba for di man, miéntras ku Cuba a gana di Aruba pa bai final.

Cuba a pika dilanti den e wega den di promé inning riba homerun, pero nos muchanan ta bini bek pa gana e partido i bira kampeon.
Di e manera aki nan ta kla pa Williamsport.

Un pabien grandi pa tur e muchanan, nan dirigentenan i tambe mayornan.
Ban keda ku mes animo pa Williamsport.
E aña aki lo ta spesial ya ku ta di 75 aña di “World Series Little League Baseball”.