Nan a fiché riba Facebook…. A kita Bijstand di muhé YDK ku a bin Kòrsou sin pèrmit

WILLEMSTAD. Lastimamente mester rekonosé ku un grupo di Yu di Kòrsou na Ulanda ta komporta nan mes di un maner asosial mientras ku di otro banda nan ta habri man kobra plaka di instansianan sosial manera ta derechi nan tin riba e plaka.
Esei tabata e kaso di un muhé YDK den kuadro di Partisipatiewet ulandes tabata haña Bijstand pasobra e no tabatin trabou.
Dado momento e persona ku ta duna guia na e muhé a raportá ku nan a miré riba Facebook di fakansi na Kòrsou huntu ku su partner lokual no ta kuadra ku meta dje Bijstand ku e ta haña.
Komo resultado dje investigashon nan a kita plaka di dos luna di Bijstand for di e muhé i kobré e plaka i ni maske e muhé a reklamá, nan a kita e sèn for di dje.
E amtenarnan di Bijstand na Ulanda a haña sa ku e muhé a paga € 1.097,- pa un biahe pa Kòrsou i hasta ku ela paga e suma na kuota na un agensia di biahe.
Esei ta nifika ku e tabatin un montante di € 1.097,- na plaka kèsh ku nan a deskonta for di dje.
E muhé a splika ku ta su èks partner a paga e biahe pa Kòrsou i ku e mes no a paga nada.
Ta resulta awor ku e plaka ku su èks partner a usa pe biahe ta produkto di otro estafa pasobra e amigu aki tabata kobra Bijstandsuitkering na Den Haag i tabata sa ku e ta bai hañé den problema ku munisipio.
E muhé a ofresé hasta pa laga nan tende un grabashon kaminda su èks partner ta atmiti ku te a duna e muhé e plaka.

NO TIN PRUEBA
Segun reglanan di Bijstand, un kobradó no mag tin tantu sén asina di su mes sino e no tin mester di plaka di Bijstand.
Te dia nan a pidié kuenta i rason e no por a proba ku ta su èks partner a duné e plaka i tampoko por a produsi e grabashon kaminda e tipo ta atmiti esaki.
Pa amtenarnan i wes ta importante pa sa unda ela haña e plaka aki pasobra si te homber a duné e plaka, mester konsidera e sén komo entrada.
E muhé no a meldu ku e tabatin e plaka serka ofisina di Bijstand i ela violá su obligashon di raportá esaki.
Pasobra ora nan husga si un hende por haña Bijstand, nan ke sa kuantu sèn kèsh e ta dispone di dje.
Pa regla ta X tantu sèn e muhé por tabatin i si e tabatin mas, anto mester baha e suma di Bijstand ku e ta haña.