NA UNDA MINISTER DOROTHY PIETERSZ-JANGA TA?

WILLEMSTAD – E kartera di Salubridat Medioambiente i Naturalesa (GMN) aktualmente ta un di esnan ku mas ta pidi atenshon di públiko.
E ministerio aki kada dia ta mas den spòtlait, tantu pa sirkunstansianan lokal komo mundial.
Pa kuminsá Kòrsou a konosé problemanan serio relashoná ku konstrukshon i maneho di hospital C.MC. Ta trata aki di un hospital ku a resultá sumamente karu, pero ku ainda no ta dunando e resultadonan ku por a spera. C.M.C kontinuamente ta den un lus negativo debí ku finansieramente kosnan ta kana hopi krekeché.
Minister señora Dorothy Pietersz Janga mes ta médiko, komo tal e ta suponé di no ta deskonosí ku e materia aki, ounke e forma sumamente reservá kon e minister aki inisialmente a presentá su mes na okashon di Covid 19, no tabata asina sabí. Lógikamente e krítikanan den direkshon di e minister tabata hopi pisá komo ku a spera ku siendo titular di salubridat lo el sa di sali padilanti, apoyando miembronan di e komunidat kurasoleño pa sigui tur e instrukshonnan ku e departamentunan ku e ta enkabesá, tabata emití. A pidi miembronan di e komunidat un sierto komportashon i mas ku klaro ku e minister pará na kabes mes no por ta esun ku ta kontradesí i òf krea duda den rasonnan pa e medidanan.
Pa loke ta trata medioambiente i naturalesa, Kòrsou lamentablemente ta konfrontando ku un ola di shushedat.
Landfillnan a reis manera ‘paddestoel’ for di suela.
Kantu di kamindanan públiko, riba plenchi, na playanan, anyhow práktikamente na tur sitio tin sakunan di plèstik, kùpnan bashí, bòternan di serbes i limonada, kahitanan di fastfood, tirá abou na suela. Ta presis loke ta duna un bista sumamente negativo di Kòrsou, siendo nos ta pretendé di ke ta un atrakshon turístiko den Karibe i den mundu.
Pió ainda ta e hecho ku shushedat di e forma aki ta fomentá malesa den pueblo ya ku shushi i porkeria ta atraé djaka, raton, kakalaka, muska, sangura i otro insektonan pa plama enfermedat den pueblo. E problema di shushi na Kòrsou natural no ta di awe, ni tampoko no ta nada fásil pa atendé, pero mester ferwagt ku e gobernante lo hasi tur loke ta na su alkanse pa trese solushon i sigur no sukumbí. Kòrsou lo no ta e úniko komunidat den mundu, kaminda mester a para duru pa resolvé e problema di shushedat ku forsa brutu.
Minister señora dr. Dorothy Pietersz Janga pa kuminsá mester ta habrí pa skucha stakeholders i tin sufisiente kurashi pa trese TUR esnan konserní huntu, pasobra e problema di shushedat ta di hinter Kòrsou. Djis sali bisa ku no tin plaka ya ta otro aktitut kompletamente robes ku mesora ta surti un impakto demotivante.
Pa por atendé e problema di shushi di formanan efektivo no por ferwagt e mesun aktitut di semper.
Ta sigur ku e maneho di Selikor mester kambia, mester traha riba resiklahe, shushi den sierto sentido mester keda kombèrtí den un fuente pa krea entrada.
Pueblo mester ta envolví atraves di skolnan, barionan, empresanan i e komunidat en general lo mester tin un partisipashon muchu mas aktivo i responsabel den esfuersonan pa tene Kòrsou limpi. Mester tin kòntròl kontinuo i baha pisá ku sanshon riba esnan ku no ta tene nan mes na e reglanan stipulá. Pues buskamentu di solushon pa e problema di shushedat na Kòrsou, no ta kos di djis un ratu, tampoko e ta algu superfisial. Minister señora Dorothy Pietersz Janga mester ke drenta profundamente den e materia i buska solushon riba un base duradero. Ekspertisio lokal, pero tambe di eksterior tin sentido, Kòrsou lo no mester tin e pretenshon di inventá e wil. Shushedat di e forma aktual ta tacha nòmber i imágen di Kòrsou i ta un fuente pa malesanan den pueblo.