Na Pittsburgh: Fiesta di hóbennan ku mester gradua e aña aki a kaba den bashamentu di bala

PITTSBURGH – Scott Schubert hefe di kuerpo polisial na Pittsburgh a konfirmá ku ayera mèrdia nan a detené dos hóben sospechoso den e kaso di bashamentu di bala na un fiesta ku a tuma luga na un kas ku a keda di hür via Airbnb fin di siman di Pasku di resurekshon.
Tin indikashon ku tabatin alrededor di 200 mucha na e kas aki na Pittsburgh kaminda e fiesta a tuma luga.
Scott Schubert a splika ku durante nan investigashon na e kas a bin haña bastante alkohòl i droga.
Algu a bai kompletamente robes ku dos hóben a kana drenta den e fiesta i kuminsá buska problema.
Resultado final di e akto aki ta ku e dos hóbennan ku tin 17 i 18 aña respektivamente lo a saka arma di kandela i kuminsá tira.
Konsekuensia di e akto kriminal aki dos adolesente ámbos di (17 aña di edat) a pèrdè nan bida miéntras 14 otro a resultá herida.
Scott Schubert a splika ku e víktimanan a keda transportá pa Allegheny General Hospital i Jefferson Hospital.
Tabatin algun adolesente ku mester a bula for bentana di dos pisa di e residensia pa evitá di keda alkansá pa tiru di bala.
Den e investigashon por a komprondé ku e dos kriminalnan aki a los aproksimadamente 50 tiru di bala.