Na Philadelphia: Delinkuentenan a pasa tira kuater studiante riba kaya

PHILADELPHIA – Ayera tabata último dia di skol debí ku awe merikanonan ta selebrá “Thanks Giving”.
Lokual a pasa ta ku un grupo di kuater studiante a sali skol i tabata kana huntu ta bai den direkshon di un sentro komersial serka di nan skol na Philadelphia.
Na kaminda ta bai e sentro komersial un outo a pasa i basha bala riba e kuater studiantenan ku konsekuensia ku tur a risibí tiru di bala. Ta trata aki di dos studiante femenino (16) i dos studiante maskulino unu di 15 i e otro di 16 aña.
Polis i ambulans a keda notifiká i ku a yega na e sitio bastante lihé pa transportá e víktimanan i investigá e kaso.
Philadelphia a bira un di e suidatnan na Merka mas violento den e último tempunan aki ya ku diariamente tin hopi kaso di violensia ku arma di kandela ta tuma luga. Tin gengnan di hóbennan ku ta metí den mundu di narkotráfiko ku ta muchu mas violento ku no ta tene konsiderashon ku ningun hende.
Danielle Outlaw hefe di kuerpo polisial na Philadelphia a bisa ku e kaso ta bou di investigashon i ku pronto lo kaptura esnan ku a kometé e krímen aki.