Internashonal
Na Peru: Polis a logra arestá 23 miembro di e geng “Tren de Aragua”
LIMA – Patricia Benavides fiskal general na Peru a konfirmá ku e siman aki polis den kombinashon ku agentenan di Ministerio Públiko a logra kaptura i detené un total di 23 integrante di e konosido geng kriminal venezolano “Tren de Aragua” na Arequipa.
Miembronan di e geng kriminal aki tin un nòmber nobo ku ta “Los Gallegos” i tabata enkargá pa kometé krímennan manera trafikashon di droga, soborno, atrako, violashon di hende muhé i hòrta outo pa bende piesa.
Fiskal general Patricia Benavides a splika ku nan mester atendé ku e kriminalnan aki lihé ya ku e grupo di bandidonan a mata tres hende durante robo resientemente na un residensia na Arequipa.
Tambe tin informashon ku mesun grupo aki a violá 15 muhé na den diferente robo na Arequipa.
Esaki ta nifiká ku outoridatnan na Peru mester a detené e kriminalnan aki pura pa asina para ku nan racha di krímennan un tras di otro.