Na Peru: Agentenan federal a logra reskatá 48 muhé ku tabata traha komo prostituta bou di menasa

LIMA – Agentenan federal di Ministerio Públiko na Peru a logra reskate un total di 48 muhé ku tabata bou di koutiverio di un organisashon kriminal.
Ta trata di muhénan di diferente pais entre otro Venezuela (16), Colombia (14), Peru (10) i Ecuador (8).
Edatnan di e muhénan aki tabata entre 16 pa 32 aña di edat ku tabata keda usa komo prostituta.
Dimitri Senmache direktor di PNP ( Policia National de Peru) a bisa ku un total di 5 hòmber Peruano ku tabata atendé ku trafikashon di e muhénan aki a keda detené.
Aparentemente e hòmbernan ku a keda detené ta pone informashon riba retnan sosial ku nan ta buska muhénan pa traha komo babysitter na Peru.
Pero na momentu ku nan yega Peru e delinkuentenan aki ta kita pasaporte di e muhénan i obligá nan traha komo prostituta.
Dimitri Senmache a bisa ku tur e sinku hòmbernan aki tin antesedente penal i ku lokual nan a hasi ta kai bou di COIP (Código Orgánico Integral Penal).