Na Paraguay: Sikarionan a asesiná periodista na momentu ku ela sali trabou

ASUNCION – Nery Portillo bosero di kuerpo polisial na Paraguay a konfirmá ku ayera tardi na momentu ku un konosido periodista tabata saliendo for di su boka di trabou pa drenta su vehíkulo dos sikario riba un motersaikel a yega serka i tire mata.
Ta trata aki di e konosido periodista ku yama Humberto Andrés Coronel Godoy (33) ku ta atendé ku notisianan hudisial na Paraguay.
Tin indikashon ku Humberto Andrés Coronel Godoy a hasi vários denunsia kaba ku ela risibí mensahenan di menasa di morto skirbi na portugues.
Den e kaso aki Humberto Andrés Coronel Godoy ta bira e di shete periodista na Paraguay ku ta keda asesiná e aña aki segun kapitan Nery Portillo.
E sindikato di Periodistanan na Paraguay a konvoka un manifestashon awe mainta dilanti edifisio di Ministerio di Interior na Asuncion pa asina outoridatnan persigi esnan ku a asesiná Humberto Andrés Coronel Godoy.
Miembronan di e sindikato di periodistanan na Paraguay ta señalá ku pa traha den prensa ta un menasa serio pa nan seguridat.