Na Orlando: Bringamentu den un bar a kaba ku shete persona a resultá herida ku tiru di bala

ORLANDO – Eric D. Smith hefe di Departamentu di polis na Orlando, Florida a informá den un konferensiá di prensa ayera ku nan mester a atendé ku un kaso di bringamentu formal den un bar ku a kaba den bashamentu di bala.
Segun testigunan ku tabata den e bar a informá polis ku e pelea a kuminsá 2’or di mardugá di djadumingu na e bar ku ta keda na Wall Street Plaza i South Orange Avenue.
Eric D. Smith a splika ku e persona ku a keda seriamente agredí den e bar a saka un arma di kandela i kuminsá basha bala pa loko.
E lokual a pasa aki a pone ku tur hende den e bar a trata na kore sali bai for di entrada di e bar pero asina mes ku ta shete hende a haña herida di bala.
Eric D. Smith a splika ku pa lokual ta e sospechoso ku a basha bala den e bar te ainda polis no a logra detené.
Departamento di Polis di Orlando a pidi yudansa pa haña e kulpabel i ta komprometé pa garantisá seguridat di residentenan, negoshi i bishitantenan ku ta di vakashon na nan suidat.
Ta p’esei Eric D. Smith a garantisá ayera ku e komunidat na Orlando por ta sigur ku nan lo bai detené esun ku basha bala den e bar.