Internashonal
Na Miami: Yu (27) ku a tira su tata mata ku rifel di asalto a keda detené
MIAMI – Art Acevedo bosero di kuerpo polisial na Miami Dade a konfirmá ku agentenan di FBI huntu ku polis a logra detené un hòmber ku a tira su tata mata i pa despues fuga.
Lokual a pasa ta ku dia 30 di Mei último a surgi un diskushon fuerte entre un hòmber identifiká komo Maurice Wright (27) i su tata.
Den e diskushon aki e yu a kuminsá bringa ku su tata i finalmente Maurice Wright a disidí na los algun tiru riba su tata ku un rifel di asalto.
Maurice Wright a bati retirada i for di momentu ei a bira fugitivo di hustisia ku a kometé un akto di asesinato.
Art Acevedo a konfirmá ku ayera tardi agentenan di FBI i polis na Miami Dade a hasi e detenshon di Maurice Wright na un kamber di hotèl na South Beach.
Maurice Wright tin ku bai duna kuenta i rason di su aktonan na outoridatnan na Miami Dade.