Na Miami: Hòmber a keda detené debí ku ela laga su yu (3) muri asfiksiá den outo

MIAMI – Ta parse ku tin hende sea no tin konsenshi of nunka a yega di tende pa no bai laga bo yu chikí keda den outo ku bentana sera durante e periodo di kalor.
Den e kaso aki e tipo di kasonan aki ta pasa demasiado biaha na Merka otro yu (3) a bira víktima di e akto iresponsabel aki.
Outoridatnan a haña informashon ku un mucha chikí no tabata duna señal di bida den un outo ku tabata stashoná na sentro di edukativo Lubavitch na Miami Gardens.
Kiko a pasa ta parse ku e tata di e kriatura aki a bai laga su yu di tres aña den un higra di solo pa sigur 4 ora ku bentana sera.
Na momentu ku un persona a baha for di su vehíkulo i nota ku tabatin un mucha den e outo a bira yama polis di inmediato.
Bomberonan, ambulans i polis a yega na e sitio mesora pa asina bai na e prosedura pa kibra e bentana i skapa bida di e kriatura aki.
Pero na momentu ku a logra saka e kriatura ku a keda identifiká komo Sholom Tauber tabata demasiado lat.
E tata di e kriatura a keda detené miéntras ku famia a atendé ku entiero di Sholom Tauber.