Na Mexico: Outoridatnan a haña 225 inmigrante ilegal sera den bodega bandoná

MEXICO – Djasabra anochi outoridatnan na Jilotepec a bin kanta bingo na momentu ku nan a bin diskubrí ku tabatin un total de 225 inmigrante ilegal sera den un bodega bandoná.
Mesora polis a notifiká agentenan di INM (Instituto Nacional de Migración) ku nan a bin mesora na e bodega pa wak realmente kiko ta pasando.
Den un komunikado ku INM a emití ayera a konfirmá ku den e bodega bandoná tabatin 194 persona di Guatemala, 14 di Honduras, 5 di Cuba i 3 di El Salvador.
Entre e inmigrantenan aki tabatin bastante menor di edat pero no a konfirmá kuantu i tampoko por a informá si nan tabatin nan mayornan huntu ku nan.
Ta trata aki di un kaso bastante tristu ya ku e hendenan aki tabatin algun dia sin kome i sin bebe awa.
Un gran kantidat di e inmigrantenan aki tabata hopi debil debí ku e bodega tabata sera i paden tabata hasi bastante kalor.
Durante e hayasgo aki dos persona ku tabata enkargá pa vigilá e bodega pa ningun di e inmigrantenan ilegalnan aki sali a keda detené.
E dos arestonan aki lo por kondusí na aresto di esnan enkargá ku trafikashon di hende na Mexico.