Na Mexico: Funshonario di seguridat nashonal a muri den aksidente di helikòpter

MEXICO – Teresa Jiménez gobernador di estado Aguascalientes a konfirmá ayera den un rueda prensa ku un helikòpter tabata transportá kuater funshonario públiko a kai serka di e aeropuerto ku e aparato a lanta buelo.
Den e helikòpter tabata biahando Porfirio Javier Sánchez Sekretario di Seguridat di Estado huntu ku tres di su kolaboradornan.
Gobernador Teresa Jiménez a splika ku Porfirio Javier Sánchez a bin ta risibí menasa di morto resientemente i ku lo bai investigá si ta trata aki di un kaso di sabotahe ku a kousa ku e helikòpter a kai.
Práktikamente nada no a sobra di e helikòpter ku a bai plama riba un vèlt bandoná na Aguascalientes. Lokual ku tin na informashon ta ku Aguascalientes ta keda konsiderá komo un di e estadonan di mas sigur na Mexico tambe kriminalidat a kuminsá lanta kabes. Ounke ku mafiosonan a kuminsá ta invertí bastante den negoshinan na Aguascalientes i esaki ta trese kuné tambe ku kriminalnan tambe ta yega.