Na memoria di Diana Lebacs, Baluarte di Arte di Palabra

“Un alma enérgiko a bandoná su kurpa pa awor biba den libertat apsoluto”, esaki ta e pensamentu ku a surgi na momento ku nos a risibí e notisia di fayesimentu di Dianan Lebacs, un di e baluartenan di Arte di Palabra na aña 2012. Diana su entusiasmo i su personalidat: semper nèchi; pèrtinènt manera lo bisa na bon papiamentu, i e alma luchadó i revolushonario, ku un amor inmenso pa papiamentu i enseñansa ta e karakterístikanan úniko ku nos lo keda kòrda huntu ku e mangasina di obra literario na papiamentu ku Diana a produsí pa nos islanan.
Diana Lebacs, huntu ku Merly Augusta i Roel Jungslager a risibí djasabra 13 di mart 2012 na K-Center e Tapushi Literario, un homenahe na baluarte di papiamentu. Premio ku e aña ei a dediká na algun eskritor ku a aportá na literatura pa mucha i hóben. Aki ta sigui e resúmen skirbí pa Mervina Bilkerdijk i ku a presentá den un sala yen di hóben di skol sekundario.
“DIANA LEBACS, tabatin for di su periodo na skol básiko interes pa kantamentu, skirbimentu i aktuashon. Despues di a terminá su estudionan sekundario, Diana a bai studia pa maestra di skol. Banda di e estudio akí, el a hasi tambe L.O. di papiamentu, hulandes i pintamentu. Tambe el a hasi estudio pa Enseñansa Spesial.
Na Universidat Nashonal di Kòrsou , el a optené tantu e grado di Bachelor of Education komo e grado di Master of Education den Idioma i Literatura papiamentu.
Na 1971, Diana, a debutá ku e novela pa hóben na hulandes, titulá Sherry, het begin van een begin. For di 1974 e ta skirbi na papiamentu tambe. Komo promé outor antiano e ta risibí na aña 1976 e premio Zilveren Griffel pa su buki di mucha Nancho van Bonaire, e promé buki di un seri di kuater. Diana su buki Caimins geheim/ Caimins secret i na papiamentu Caimin su sekreto (ana 2001) ta gana e premio kultural di literatura hubenil Prins Bernhard Fonds di Antia i Aruba na ana 2003. Diana a skirbi i dirigí diferente obra teatral pa mucha manera Buchi Wan Pia Fini , De Deur, Robin en de Reuzenrobot i Flor di Kuskus. Riba tereno di enseñansa, ta importante menshoná envolvimentu di Diana komo desaroyadó di material pa e método “Papiamentu, nos idioma” i tambe ko-outor di e método Mosaiko. Komo outor por bisa ku Diana tin total 13 buki na hulandes i un total di 21 publikashon na papiamentu bou di kua tin buki pa mucha, buki di prenchi, obra teatral pa mucha i programa edukativo di televishon.
Nos baluarte, Diana, a risibi diferente rekonosimentu. Algun di nan ta:
1997 – Festival di buki pa mucha di e Fundashon Nana, tabata dediká na Diana Lebacs tantu na Hulanda, Antia komo Aruba.
2009 – “Bos di hubentut’ ta duna plakat na Diana Lebacs pa su kontribushon na e obra Kibra ku e gritunan silensioso.
Esaki ta simplemente un resúmen di e trabou balioso ku nos baluarte Sra. Diana Lebacs a ehekutá riba tereno di arte, spesialmente literatura hubenil ku énfasis pues riba desaroyo di buki pa mucha. Diana, danki di kurason pa e aporte balioso.”
Na nòmber di henter famia di Arte di Palabra nos palabranan di sosten i konsuelo pa famia, amistat, kolega i konosí di Diana Labacs. Diana danki pa bo amor pa arte, papiamentu i kada un di bo obranan. Nan lo sigui ta un ehèmpel pa nos!
Ku Diana Lebacs su alma gosa di e bida nobo den libertat apsoluto!
Na nòmber di henter famia di Arte di Palabra
Elvira Bonafacio i Ange Jessurun