Na Maryland: Avioneta a bai pega den toren di elektrisidat lagando mas ku 80.000 kas sin koriente

MARYLAND – Pete Piringer bosero di servisio di bombero i reskate na e kondado di Montgomery a konfirmá ku un avioneta ku dos persona abordo a bai pega den un toren di koriente ku konsekuensia mas ku 80.000 kas a keda sin koriente.
E aparato ku a bula bai pega den e toren di koriente ta un avioneta model Mooney M20J ku a lanta buelo na White Plains, New York ku dos persona abordo.
E dos okupantenan den e avioneta a keda identifiká komo Patrick Merkle (65) i e pasahero komo Jan Williams (66).
Pete Piringer a splika ku ta un milager ku e dos okupantenan den e avioneta ta na bida debí ku ta koriente di vòltahe hopi haltu tin den e toren kaminda nan a bai pega aden.
Empleadonan di e kompania di koriente na Montgomery a traha durante mas ku 24 ora pa saka e dos okupantenan for di e avioneta.
Patrick Merkle kende ta a piloto i doño di e avioneta a splika ku e motor di e avioneta no tabata funshoná bon i a trata na bolbe e aeropuerto di Montgomery bek pero debí na poko visibilidat a bai pega den e toren di koriente.