Na Iran: Avion di kombate a aksidenta lagando un saldo di dos morto

TEHERAN – Mohammad-Reza Jannessari gobernador na Isfahan a konfirmá ku tabatin un avion di Forsa aéreo Iraní a bin dal den un edifisio ayera durante dia.
Lokual a pasa ta ku dos piloto den un avion di kombate model Chengdu J-7 a lanta buelo na base na Isfahan riba un mishon di ehersisio di entrenamentu na e region.
Algu a bai kompletamente robes ku e avion di kombate ku a bai dal den un edifisio bandoná na Isfahan algun ratu despues di lanta buelo.
Gobernador Mohammad-Reza Jannessari a splika ku e parti trágiko di e asuntu aki ta ku dos piloto di forsa aéreo Iraní a fayesé. Pa lokual ta e aña aki kaba esaki ta bira e di tres avion di kombate di Forsa aéreo Iraní ku ta kai pa fayonan tékniko.
Forsa aéreo Iraní ta konta ku un total di 300 avion di kombate entre nan (MiG-29 i Su-25) kumpra na Rusia, (F-7) China, (F-4, F-5 i F-14) Merka, (Mirage F1) Fransia i algun “Saeqeh” ku a keda fábrika na Iran mes.
Gran parti di e avionnan aki falta mantenshon debí ku Merka a pone asina tantu sanshon kontra Iran ku nan no por kumpra piesa.