Na Honduras: Kuater hòmber entre nan yu di eks presidente Porfirio Lobo a keda asesiná

TEGUCIGALPA – Kapitan Xiomara Castro direktor di kuerpo polisial na Honduras a konfirmá ku e yu hòmber di eks presidente Porfirio Lobo huntu ku tres amigu a keda kruelmente asesiná pa un grupo di sikario.
Lokual a pasa segun Kapitan Xiomara Castro ta ku e yu hòmber di Porfirio Lobo identifiká komo Said Lobo Bonilla (19) a kaba di sali for di un diskoteka huntu ku su tres amigunan i tabata bayendo kas.
Na kaminda vários vehíkulo ku sikarionan aden a sigi e shofùr ku tabata transportá Said Lobo Bonilla i su tres amigunan.
E sikarionan a baha Said Lobo Bonilla i su amigunan for di e SUV pa despues tira kada un di e hóbennan aki den kabes.
Kapitan Xiomara Castro a splika ku lokual a pasa aki a keda bon planeá ya ku e kriminalnan tabata na altura ku Said Lobo Bonilla i su otro amigunan tabata yunan di hende ku plaka tabata biba na un kompleho di apartamento eksklusivo na Tegucigalpa.
E otro víktimanan ku a pèrdè nan bida den e kaso aki a keda identifiká komo Luis Zelaya (23), Salomón Velásquez (21) i Norlan Enrique Rodríguez (19).
Segun fuentenan polisial violensia kriminal na Honduras ta laga un promedio di entre 10 pa 13 morto pa dia.