Na Filadelfia: Dos agente polisial a resultá herida den un tiroteo durante selebrashon di 4th of Yuly

FILADELFIA – Danielle Outlaw direktor di kuerpo polisial na Filadelfia a konfirmá ku ayera nochi alrededor di 9:45 P.M. tabatin un desfile i un show di vürwèrk den sentro di suidat.
Ta un kustumber ku tur aña riba e fecha di 4th of Yuly aki sa tin hopi hende ta bai aglomerá den sentro di suidat pa wak e espektákulo aki.
Danielle Outlaw a splika ku un deskonosí for di un lugá skondí a tira riba dos agente polisial ku tabata hiba kontrol serka di Spring Garden.
Un agente a risibí tiru di bala den kabes miéntras ku e otro a haña bala den lomba i asina ámbos mester a keda transportá ku urgensia pa hospital.
Danielle Outlaw a bisa ku tin un rekompensa di $20.000 pa kaptura di esnan ku a tira i ku te ainda no tin ningun detenshon.