Na Colombia: Pistoleronan a asesiná un periodista ku ta direktor di kanal di televishon

BOGOTA – Fabian Mauricio Echeverria alkalde na munisipio de La Unión Nariño a konfirmá ku ayera pistolero riba un motersaikel a sorprendé un periodista i direktor di Unión Televishon.
Ta trata aki di e periodista ku yama Wilder Alfredo Córdoba (35) ku aparentemente a risibí menasa di morto for di algun siman pasa kaba pa lokual ela bin ta denunsia.
Wilder Alfredo Córdoba a kaba di traha i tabata bayendo kas riba su motersaikel i aki dos hòmber riba un motersaikel a pasa den su banda i tira mata.
Alkalde Fabian Mauricio Echeverria a splika ku lokual a pasa aki ta kondenabel ya ku Wilder Alfredo Córdoba ta bira e di 7 periodista ku pistoleronan ta tira mata pa lokual ta e aña aki.
Allaldía di La Unión Nariño a ofresé un rekompensa ekivalente na $4.000 dòler pa kualkier informashon ku por kondusí na kaptura di e dos delinkuentenan ku ta responsabel pa morto di Wilder Alfredo Córdoba.
Lokual ku por solushoná e kaso di asesinato di e periodista Wilder Alfredo Córdoba ta ku tin hende a wak nan.