Na California: Kaso mas di tiroteo ta laga un saldo di 4 morto i un herido

CALIFORNIA – Ayera tardi alrededor di 5:30’or sentral di polis na e kondado di Orange a risibí un yamada di emergensia kaminda un persona a notifiká ku tabatin bashamentu di bala den un ofisina den un Business Center.

Mesora polisnan a keda notifiká pa wak kiko realmente tabata pasando na Business Center.

Na e yegada di e promé patruya a bin topa ku un hòmber armá ku a lòs algun tiru dirigí riba e agente polisial.

Esaki naturalmente a kondusí ku e polis a tira bèk riba e hòmber ku a keda seriamente herida.

Na momentu ku polis a bai kontrolá den e kompleho a bin topa ku kuater hende morto den un ofisina entre nan un menor di edat.

Jennifer Amat bosero di polis na California a indika ku ta sospecha ku e hòmber ku polis a tira ku ta den estado kritiko lo a mata tur e hendenan den e ofisina.

E kaso aki ta bou di investigashon pa wak ta dikon e hòmber aki lo a kometé e krímen asina horibel.

Den apénas tres siman di tempu tabatin 3 kaso kaminda hendenan ku mente malvado ta mata hopi hende pareu.