Na California: Asiátiko a drenta diskoteka djasabra anochi i tira 10 hende mata

CALIFORNIA – Scott Wiese hefe di kuerpo polisial na Los Angeles a konfirmá ku djasabra alrededor di 10’or di anochi sentral di polis a risibí vários yamada indikando ku tabatin bashamentu di bala den un diskoteka na Monterey Park.
Na momentu ku polis, ambulans a yega i drenta den e lokalidat a bin topa ku un káos total paden i pafó. Lokual a pasa ta ku djasabra tabata aña nobo pa Chinesnan i un multitut grandi di asiatikonan a bai selebrá den e diskoteka na Monterey Park.
Parse ku un hòmber identifiká komo Huu Can Tran (72) a kana drenta den e diskoteka ku un arma semioutomátiko i kuminsá basha bala di un forma indiskrimina. Scott Wiese a splika ku 10 persona a fayesé na e luga di krímen i otro 10 persona a resultá herida di tiru di bala.
Ta trata aki di Asiatikonan di entre 50 pa 60 aña di edat ku a pèrdè nan bida of a keda herida.
30 minüt despues ku Huu Can Tran a kaba di kometé e krímen den e diskoteka ela bai trata na hasi meskos na otro sentro nokturno.
Aki dos hòmber a logra kita su arma di kandela i ela logra hui.
Huu Can Tran a bai su apartamento i teniendo kuenta ku polis ta bin busk’é ala kometé suisidio.