Mucha muhé di 16 aña ta insisti di bira bandolera apesar di yudansa

WILLEMSTAD. Na e momentonan aki Raad voor de Kinderbescherming na Alkmaar ta man na kabes ku e kaso di un mucha muhé yu’i Korsou ku ta insisti di hiba un rumbo parotin malu i bandolero i ounke instansianan ke yuda, e mama mes ta stroba.
Poko dia pasá e kaso tabata den korte hubenil atrobe kaminda abogado mr. Rafaela i tur instansia sosial hubenil a bini huntu pa konsulta kon ta bai atende ku e mucha muhé.
Legalmente e mama tin poder riba e menor di edat pero Kinderbescherming a pidi pa nan por ‘traha’ ku e mucha un aña pasobra nan ta masha preokupa ku rumbo di bida dje mucha.
Masha tempu e no ta bai skol, e ta depresivo pero no ke bai dòkter.
E mama no por konvensé pa bai skol ounke nan ta sali masha bon ku otro i ta biba huntu den un kas ku ta kasi basha den otro.
E problema ta ku e mama no tin konfiansa den e sistema di asistensia sosial ulandes i ta haña ku skol of otro hende tin ku resolve nan problemanan.
Aktualmente e mucha ta den isolashon sosial i no ta bai skol pero tur dia ta sali ku otro mucha homber.

E MUCHA NO KE
Durante e kaso den korte e mucha a bisa wes ku e no tin, mester di yudansa sosial i ke keda ku su mama na kas.
Finalmente a konvense pa bai skol pero el a keda mas kas ku a bai skol pasobra na kas e ta sintié bon ta yuda su mama i ta bai sportschool ku su ruman.
E no ke bai skol pasobra nan ta bully e mucha pa su rasa i dosentenan no ta para e kos aki.
Den klas no tin trankilidat i ela pidi e dosente pe studia den gang pero esaki a ninga i e mucha a pensa masha kos negativo.
E abogado Mr. Rafaela a splika ku e mama ta haña ku e yu ta ehemplar i no tin kuestion di bebida alkoholiko i droga.
E mama ta kere mashá den abogado Rafaela i no ke pa nan manda su yu un instituto pero pa duna e abogado un chèns pa intermedia.
E mama mes ta kan-kan di problema i loke e kier ta pa bin Kòrsou bèk pero no ta logrando.
Ora wes a tuma palabra ela bisa ku e ta haña ku mester manda e mucha pa Jeugdbescherming pasobra riba kaya e ta bai pèrdí.
Loke a pone ku wes ke pa hiba e mucha Jeugdbescherming ta ku poko dia pasá ela ‘pèrdè’ i nan a hañé den kas di un hòmber kaminda ela bai skonde den kashi.
P’esei wes a dikta ku mester hiba e mucha Jeugdbescherming i evaluá ku tempu kon ta bai pasobra riba kaya ta karni pa tribon e ta bira.