Moshon a pasa den parlamento: Para fondo pa Wardakosta si abusu kontra eksiliado sigi

WILLEMSTAD. Un nota menos positivo den e litania di moshonnan ku a keda tratá dos siman pasá den parlamento ulandes i riba kual nan a vota ayera, tabata e moshon di Laura Bromet di GroenLinks pa konhelá fondo ku gobiernu di Kòrsou pa protehá nos frontera mientras ku ta sigi tin abusu kontra refugiadonan ku ta pidi asilo den nos pais.

E rapòrt na kual e moshon di GroenLinks ta referi ta di Human Rights Defense Curacao i Amnesty International kaminda nan a denunsia ku gobiernu di Kòrsou ta ninga refugiadonan pa kuminsa un kaso legal pa haña asilo.
Gobiernu di Kòrsou c.q. e kadena Hudisial ta sera e personanan aki sin un proseso imparsial i sin defensa apropiá mientras ku nan ta sufri maltrato i eksplotashon riba un base struktural i permanente.
Un arma pa para e abusu inhumano aki ta pa konhelá fondo ku Ulanda ta duna pa yuda protehá kosta i frontera di Aruba i Kòrsou pasobra ta ku plaka ku Ulanda ta duna, gobiernu di Kòrsou i Aruba ta violá derecho humano strukturalmente.
Ku e plaka ku Ulanda ta duna nan ta kómplise na mantené un sistema inhumano i malafide.
P’esei e moshon ku a keda aprobá den parlamento ulandes ayera ta pidi pa gobiernu ulandes konhelá e yudansa finansiero pa protekshon di frontera di Aruba i Kòrsou te dia e dos paisnan stòp di violá derecho humano i apliká proseso di trata petishon pa haña asilo pa refugiado manera Nashonnan Uní ta dikta.