“Moros en la costa” pa casinonan online Kòrsou

WILLEMSTAD. Invisibel pa e suidadano komun i koriente tin un menasa pintando na horizonte ku por afektá un pilá ekonomiko/finansiero di nos pais fuerte den futuro serkano.
Ta trata di e pilá di wega di plaka via portal di kompiuter ku nan ta yama Online.

Un grupo di konglomerashon di kapitalista ku tin lisensia na varios pais na mundu pa e parti lisensia i sup-lisensia pa hunga plaka via otro pais ta deliberando aktualmente na Malta pa disidi si mester skohe otro pais pa kanalisá nan weganan di plaka online pasobra nan a tende rumor ku gobiernu di Kòrsou tin intenshon di hala faha mara riba nan kabes pa evitá e minimo señal di ilegalidat den e sektor aki.
Ya kaba tin hopi kaso den korte di casinonan ku tin un sup-lisensia i ku ora un kliente gana plaka, nan no ta paga resultando den un doló di kabes monumental pa kliente kobra.
No solamente doló di kabes pero e ta kreando un mal reputason pa Kòrsou i komo pais ku ta reparti lisensia i portadonan di sup-lisensia ta praktika chanchuyo.
Den Korte aki na Kòrsou mes regularmente tin e kasonan aki awor ku tin un Fundashon ku ta sali na defensa di kllientenan,ku a keda perhudiká.
E menasa na kual nos a referi i ku ta lantando kabes ta ku e problemanan aki a yega Parlamento na Ulanda i esaki na su turno a ordena minister Weerwind pa kuminsá investigá ta ki ta pasando riba tereno di wega di plaka online pasobra ya nan a determiná ku 10 di kada makamba ta hunga plaka online.
Aña pasá oktober gobiernu ulandes a habri e merkado pa hunga plaka den casino Online i Ulanda a keda inundá ku propaganda pa e tipo di wega di plaka aki.
Televishon ulandes ta kan-kan di propaganda pero loke gobiernu ulandes ke evita ta ku ta hendenan dje gruponan sosial mas debil ta birae klientenan mas grandi dje kasinonan i ta krea un situashon meskos ku na Kòrsou ku dia di paga Onderstand un fila di hende ta pará na porta di casinonan.
Tambe Ulanda ke introdusi un limite di plaka ku kliente por hunga pero nan a komparando kon esei ta hinká den otro den varios pais entre otro na Kòrsou.