Montaña ta bai sende lus pa di 19 biaha

Willemstad – Manera ya a bira e tradishon i kustumber di fin di aña aya na Montaña ta e sendementu di lus di e dushi temporada ku nos a drenta aki kual ta luna di Desèmber. E organisashon di The Excellence Quality Art enkabesá pa e hóben Fabian Martina ta den e kompletu preparashonnan ku hopi perspektiva pa e di 19 edishon di sendementu di lus di e pesebre mas grandi den e área di Montaña, Banda ariba i bisindario. E lokual ku ta hasi e pesebre aki úniko i diferente for di tur sobra ta ku e ta keda konstruí kompletamente ku materialnan resiklá. I e máksimo atrakshon di e pesebre aki ta e animalnan bibu i real ku tambe ta forma parti di hinter e totalidat.
Naturalmente manera semper e organisashon di The Excellence Quality Art ta duna rekonosementu na algun persona òf organisashonnan ku a nifiká algu pa nan komo organisashon pero tambe ku di un òf otro forma a destaká i sobresalí riba otro áreanan den komunidat.

P’esei e aña aki e organisashon di TEQA ta rendi homenage na 5 persona i na 2 kompania lokal ku ta kere den promové i sostené e lokualnan ku ta di nos. Esakinan lo ta: Sra: Cenaida van Dinter, Sra Laurine Lovert Regina, Sra. Desiree Fingal, Sr. Glendon Aniceta, Sr. Joseph Girigorie, Kreaheadwraps i Divino Catering.
Riba e anochi di sendementu di lus aki e 7 homenahiadonan lo risibí serka e organisashon di TEQA un rekonosementu digno.

Bario di Montaña ta sende lus djasabra dia 10 di Desèmber 2022 pa 19:30 na Kaya Kané ( hanchi pabou di toko Jomali) zijweg di kaminda Venancio Isenia.