Momento pa pone emoshonalidat un banda

Sintá ku mannan krusá riba otro ta warda mana kai fo’i shelu, Kòrsou hamas lo por sali for di e tantísimo dilemanan ku e ta konfrontá kuné aktualmente. Anto aki mi ta referí klaramente na e enorme desempleo ku nos isla a hañ’é kuné kousá pa empresanan ku a sera unu tras di otro durante e último dékadanan.

Mira por ehèmpel sentro di siudat, Punda i Otrobanda kon den un situashon moribundo nos ta. Na de Ruyterkade nos a haña nos ku barkunan di fruta venezolano ku a stòp di ta aktivo ku benta di fruta i berdura. Bosonan ta kòrda e situashon di refineria ku ainda no tin klaridat riba su kontinuashon?
Pa loke ta trata refineria, ainda tin e historia ku nos ketu bai ta pendiente di resultadonan di deliberashon. Ratu, ratu señor Marcelino “Chonky” de lannoy di RdK ta aparesé riba pantaya ku kualke pida historia. Kompania di aviashon Inselair definitivamente a pasa pa historia i ku sin duda tabata un piesa klave, un faktor ku notablemente a krea un falta grandi di konekshon aéreo.
UTS a keda bendé ku FLOW pa rasonnan ku te awe ningun hende no por komprondé i ku resultadonan kasi intragabel. Vários hotèl a bati retirada, e kolosal Curaçao Plaza Hotèl, Hotèl Otrobanda, Hotèl Howard Johnson, tur a pasa pa historia.
No papia mes di empresanan ku pa hopi aña a hunga un papel di importansia den Kòrsou manera WIMCO i otronan. Pero komo si fuera no ta basta e komunidat aki a hañ’é konfrontá ku e krísis di Covid 19 ku ta e kousante di otro ola di gòlpinan fuerte pa nos ekonomia i lógikamente su impaktonan negativo riba e sirkunstansia sosial en general. Oumento di pobresa, situashonnan di desesperashon den kasnan di famia.
Mester hasi tur esfuerso pa krímen no tuma over den forma di atrakonan armá, ladronisia di outo na gran eskala etcetera.
Pero pa kuminsá nos pais di ningun manera lo no por resolvé e problemanan aki ku un aktitut negativo den polítika i gobernashon, pa kolmo kombiná ku un prensa ku mas bien ta yuda suak e sirkunstansia mental spiritual na momento ku mas ku nunka motivashon i kreatividat ta determinante pa por lanta kabes bèk.
E sistema di bati na porta di Ulanda, mendigá pa plaka sea pa hasi fiansa òf pa logra un donashon, tampoko no ta duna resultadonan satisfaktorio, pasobra Ulanda ta probechá di e situashon ku nos ta aden pa atendé su propio benefisio. Kòrsou mester kuminsá from scratch, nos mester ban bèk na rais di nos problemanan pa formulá un plan total di mas aña pa atendé nos problemanan tantu riba tèrmino kòrtiku, medio komo largu. Nos lo no sali afó, keriendo únikamente den turismo òf hasiendo loke añanan nos ta hasiendo kaba, konsentrando kasi riba aspektonan finansiero i presupuestario so. Kòrsou ta den e sirkunstansia ku mester pone tur emoshonalidat un banda, anto duna espasio na siudadanonan ku ta vèrsá den e materia, kendenan tin un formashon akadémiko debido i ku por duna e aporte nesesario pa trese solushon, anto aki mester pensa riba dr. Rutsel Martha, dr. Emsley Tromp, mr. drs Caryl Monte i mr Suzy Camelia Römer. Kada un di e persona ariba menshona por skohe 2 òf 3 persona pa asesorá nan. Konosementu i eksperensia den e sirkunstansia aktual mester prevalesé riba preferensia personal i simpatia partikular.
Kòrsou mester probechá pa kana kamindanan nobo. Skohiendo áreanan ku tur tempu tabata neglishá, pero ku tabata di fundamental importansia pa desaroyo di nos isla. Invershon den formashon i preparashon di hende via enseñansa, invershon di bario pa drecha e sirkunstansia sosial no por sigui zona komo si fuera ta abrakadabra nos ta papia di dje.