Misterio ken lo remplasá Raymond Knops awor!

WILLEMSTAD. “Pájaronan de mal aguero” tin tur kaminda pa uza nan influensia negativo manera por ehempel e spekulashon ta kua politiko ulandes lo remplasa Raymond Knops komo Sekretario di Estado responsabel pa relashonnan den Reino ounke for di awe mainta trempan e rumor a lanta kabes ku ta un tal Kees Verhoeven lo bai okupá e funshon te ora Kees mes a lansa un mensahe ku a bira virtual i ku tambe virtualmente a spat tur spekulashon for di otro ku e lo asumi e kargo.
Kees Verhoeven a manda un mensahe personal pa tur hende kompronde ku e no ta interesa den un puesto ministerial i sigur no den e kartera di Digitalisashon pasobra e no tin basta peso pa e dediká su mes full time na esaki so.
Ademas tin otro asuntunan ku mester di su atenshon mas urgente manera e hecho ku su kasá a kaba di haña yuchi i esei ta un tema ku e no tin intenshon di neglishá.
E kandidato pa minister mes di Relashon den Reino ta Franc Weerwind kende ta un politiko profeshonal ku a hasi karera impreshonante i ku aktualmente ta alkalde na Almere.
Pues e spekulashon ku Kees Verhoeven lo remplasa Knops ta sin base ounke nada ta sigur ni definitivo den mundu politiko ulandes.
Un kos sí ta sigur, no kabe duda ku entre e politikonan na Ulanda ora tin rumor ta sirkulá ta pasobra ela sali for di fuente digno di kredito.
E minister nobo di Relashon den Reino ta Franc Weerwind (D66) kende tabata alkalde di Velsen i promé ku esei alkalde di varios siudat ulandes i praktikamente ta un alkalde profeshonal ku bon reputashon.
Ounke Frans a nase na Amsterdam ela lanta na Nieuw Vennep i despues a studia materia di gobernashon na Leiden. E tabata kompañero di estudio di Rei Willem Alexander.
E ta un dje fundadornan di Stichting Vriendschapsbanden Nederland Suriname. E ta hopi deportivo i ta presidente di Asosiashon di siklista na Ulanda. Kees Verhoeven ta miembro di parlamento pa D66 i ta spesialista den materia di digitalisashon i su meta ta pa na aña 2030 Ulanda ta lider den digitalisashon i di outomatisashon.
Pa esei ela boga pa gobiernu pone mil mion Euro disponibel pa kontratá eksperto i hasi investigashon.
E ta atverti fuertemente kontra empresanan sosial digital gigantesko i ta haña ku gigantenan manera Facebook i Google mester ta mas responsabel.