Misa pa pidi Bendishon pa nos Mandatarionan

Rumannan,
Awe nos a reuní pa selebrá e S. S. di Misa aki pa pidi Dios su asistensia i bendishon pa nos mandatarionan: pa esnan ku a finalisá nan sirbishi i pa esnan ku a kaba di huramentá i ta kuminsá un etapa nobo pa nos pais Kòrsou. Komo pueblo kreyente den Dios i mayoria di nos kristian-katóliko, nos ta kere ku Dios ta guia historia di mundu. Nos ta kere tambe ku tur outoridat ta bini di djE i ku Hesukristu a bini pa inougurá un reino di pas i hustisia, un reino di bida i bèrdat, un reino ku no tin fin.
Den e lekturanan di e Palabra di Dios ku nos a kaba proklamá, san Pablo ta pidi komunidat di Korintio pa keda fiel na e fe i perseverá den dje. E ta spièrta nos pa no keda korumpí dor di doktrinanan falsu, i pèrdè e deboshon sinsero i puru pa Kristu (cf. 2Kor 11: 3-5). Ku otro palabra laga nos perseverá riba e doktrina i e tradishonnan sano ku nos a risibí di nos antepasadonan. Nos a risibí e fe den Dios ku Hesukristu a siña nos pa yam’é nos Tata. Anto un fe ku ta manifestá den