Ministerio Publiko a pidi 20 aña di kastigu pa asesinato di antiano

AMSTERDAM OOST. Den anochi di 17 pa 18 di di november 2020 e antiano

Amanuel ‘Maantje’ Sambo di 30 aña a pèrdè su bida  despues di un fiesta di kumpleaño den Transvaalstraat na Krügerplein den Amsterdam-Oost ora un kontrinkante ku kende e tabatin problema a lòs dos bala dirigi den su lomba i dokternan no por a salba su bida den hospital.

Siman pasá e kaso a bin dilanti di korte kaminda fiskal a pidi 20 aña di kastigu pe sospechoso prinsipal ku kende Maantje tabatin un forsageo riba kaya.

Originalmente polis tabatin masha problema pa haña informashon riba e kaso pasobra tabata mardugá i mayoria dje hendenan ku tabata ne fiesta a bai kas kaba pero nan a logra rekonstrui kiko a pasa.

Despues dje fiesta Maantje ku un konosi a kana bai Krügerplein kaminda ela laga su baiskel. Un grupo di kuater homber tabata kana nan tras  i tres di nan  a ataká Maantje  i durante e forsageo ku a sigi un di nan a tir’é den su lomba.

Ne okashon ei polis a detené dos sospechoso di 21 i 24 aña.

Mientras tantu den transkurso di e aña aki Ministerio Publiko a haña pista ku ta mustra ku ta un tal Zion R. di Zuidoost a tira  ‘Maantje’ Sambo mata riba Krugerplein.

Hustisia ta konvensi ku ta  Zion ‘Spoortje’ R. (22) di Zuidoost  a mata e antiano despues dje fiesta.

Tin terser sospechoso pero no a revela su identidat.

E sospechoso Tyrone B. (28) lo a manehá e outo den kual nan a hui.

Despues dje seshon pro forma a sera nan den sèl.

Durante e forsageo entre Maantje i e sospechoso prinsipal testigunan a tende dos tiru di arma di kandela.

Algun minit despues dje tiroteo polis a detené Zion i Joshua.

Tantu korte komo hustisia ta mira prueba den un kombersashon ku nan a tap entre Zion i su amiga den Huis van Bewaring.

Originalmente  tabata difisil desifrá  loke nan a papia  pero ku aparatonan mas avansá nan a desifrá loke nan a papia.

Einan Zion lo a bisa “Mi a tira” i ta diskuti ku si  lo bisa  polis unda  e arma ta i kuantu kastigu esei lo produsi.

Zion ta un mula di droga aktivo i ku nan a menshona e arma pa malu pa mira si  personal di prizon lo bisa polis pasobra e kier a pasa hasji di kontrabanda den prizon.

Polis a haña pòlbu di bala tambe riba man i pañanan di dos dje sospechosonan i riba e kashinan di bala ku tabatin na e sitio i riba paña di Sambo.

Abogado Jan-Hein Kuijpers di Zion a bisa wes ku tur e viktimanan sa brasa otro ora nan topa i p’esei por tabatin pòlbu riba nan paña.

Den e kaso aki reshèrshe di Rotterdam a purba hasi un trampa pa e amiga di Tyron mandando un karta ku e pregunta “Dikon Maantje mester a muri?2 pa dje forma aki e kai den pániko i bai papia ku reshèrshe.

Ta siman pasá el a realisa ku tabata un karta trampa. Dia 8 di yuli e kaso ta sigi.