Minister mester disidí atrobe tokante e dekretonan di e presupuesto di CMC

WILLEMSTAD.CMC ta e hospital nobo na Kòrsou ku ta ofresé kuido for di novèmber 2019. Tur aña CMC ta risibí un presupuesto di Minister di Salubridat Públiko.
E presupuesto ta pa kubri e gastunan ku CMC tin na momentu ku ta otorgá kuido na personanan ku tin seguro di malesa básiko (BVZ).
E kasonan aki ta trata e presupuestonan stipulá pa añanan 2020 i 2021. CMC ta di opinion ku e presupuestonan ta muchu abou i e Minister no ta di akuerdo ku esaki.

Ki interes tin den e kasonan aki?
Si e presupuesto no ser oumentá, CMC ta di opinion ku e kontinuidat di kuido ta na peliger.
E pèrdidanan na CMC ta ser okashoná pa motibu ku:
· den pasado gobièrnu a tuma sierto desishonnan polítiko kaminda mester traha e hospital,
· a tuma personal di Sehos over
· e kolaborashon obligatorio ku un laboratorio eksterno di gobiernu ADC
· i e problemátika di e personanan ku no ta sigurá.
Segun CMC, awor ta e Minister ku, na nòmber di gobièrnu, mester asumí e konsekuensianan di e desishonnan polítiko aki i no CMC.
E Minister ta indiká ku e presupuesto di CMC ta sali for di e fondo di BVZ. E fondo aki ta ser mantené pa personanan ku ta paga nan prima i tambe dor di kontribushon di gobièrnu.
For di e fondo aki ta finansiá otro kuido tambe, manera kuido di dòkter di kas i kuido farmaseutiko.
E fondo ya ta tin un défisit. Mas presupuesto pa CMC ta nifiká menos plaka pa kuido primario.
Si e kuido primario haña menos presupuesto, e kalidat di esaki por bira menos, loke ta krea mas preshon riba kuido sekundario na CMC, por ehèmpel. I si e défisit di e fondo sigui oumentá, e sosten di likides di Hulanda ta kore peliger.
E kondishon pa haña mas sosten di likides ta entre otro ku e défisit den e fondonan sosial no mag sigui oumentá.
Segun e Minister, e sosten di likides di Hulanda ta di gran importansia pa henter pueblo di Kòrsou loke ta logiko pasobra gobiernu mes no sa manehá fondo i a hinka CMC den e chekumpé aki.