Internashonal
Minister di eksterior di Alemania: A akusá Vladimir Putin di usa hamber komo arma di gera
BERLIN – Annalena Baerbock minister enkargá ku e kartera di relashonnan eksterior a bisa ayera den su rueda ku prensa ku presidente Vladimir Putin ta usando hamber komo arma di gera.
E motibu dikon Annalena Baerbock ta bisa esaki ta debí ku Vladimir Putin a ordená su militarnan mantené blòkia eksportashonnan di 20 mion tonelada di grano ku mester keda manda pa paisnan Afrikano i Asia.
Aktualmente tur e hafnan na Ukrania ta bon vigilá pa barkunan di gera Ruso pa asina no transportá e grano pa Afrika i Asia.
Esaki ta nifiká ku pronto no solamente e paisnan den kontinente Afrikano i Asiátiko sin na nivel global lo bai tin krísis alimentario. E demanda pa grano na nivel global ta asina haltu ku e otro paisnan ku si tin lo bai subi su balor mas ainda ku e ta kaba.
Vladimir Putin ta bon na altura ku hopi pais ta usa grano pa Corn Flakes kaminda paisnan pober riba e planeta aki ta usa pa alimentá nan poblashon.
António Guterres sekretario general di Nashonnan Uni a bisa kuné momentunan aki kaba tin 135 mion hende ku ta den inseguridat alimentario.