Minister Dangui Oduber Aruba ta keda “trendsetter” den Caribe y Americas ora ta trata di inovacion den control di salud na frontera

ORANJESTAD-Diahuebs mainta Minister di Turismo y Salud Publico sr. Dangui Oduber conhuntamente cu sr. Yuri Feliciano kende t’e Project Manager di Aruba Health App System (AHA) a reuni cu e Manager di e organisacion di SITA aki na Aruba sr. Mauricio Pazzara.

Den e reunion aki a papia tocante e proyecto cu a cuminsa na april di aña 2020 entre SITA y AHA cu porcierto tabata un gran exito. Tambe a papia riba kico lo bira e siguiente fase di e proyecto.
SITA ta un compania multi nacional di informacion y tecnologia. Tambe SITA t’e programa mas uza rond mundo den industria di aviacion.

Nan ta ta provee servicio di IT y telecomunicacion na aeropuerto y aeroliñanan rond mundo, por ehempel e sistema cu ta wordo uza pa “check-inn” pasahero ta di SITA.
E parti di mas importante ta cu e programa di SITA ta garantisa seguridad y privacidad total di tur e usuarionan atrabes di un sistema cu ta verifica e credencialnan di cada usuario.

E manera cu esaki lo funciona ta, p.e. na momento cu bo haci bo test di Covid esaki ta bay atrabes di e laboratorio pa bo AHA y e ora esaki ta keda verifica pa SITA.
E manera di e proceso aki ta un hopi sigur y e usuario por tin trankilidad cu su informacion medico ta keda den privacidad.

E desaroyo nobo aki lo bay facilita henter e proceso di entrada na Aruba p’e pasaheronan. E pasaheronan ya no mester warda mas pa nan resultado di e PCR test wordo acepta y e upload di e certificado di e test ta keda pa pasado.
Minister Dangui Oduber a kibra tur barera den inovacion pa locual ta trata controlnan di salud na frontera atrabes di AHA cu a haci e proceso na Aruba su frontera esun di mas liher den henter Caribe. E inovacion di AHA a haci cu Aruba a haya e atencion di socionan manera VFS Global, Common Project y SITA. El a percura pa mehora e relacion existente cu Estados Unidos caminda New York y New Jersey a mustra hopi interes.
Aruba tabata e prome den Caribe y Americas pa habri su frontera uzando Certificado di Corona digital.