Internashonal
Miguel Díaz-Canel a yega China i ta haña respaldo total di Xi Jinping
PEKIN – Miguel Díaz-Canel presidente di Cuba a yega China ayera i por bisa ku ela haña un resepshon royal serka funshonarionan di e atministrashon di Jinping na aeropuerto.
Tabata un invitashon ofisial ku a bini di parti presidente Xi Jinping mes i ku por bisa ku e mandatario Chino a keda kontentu ku Miguel Díaz-Canel a aseptá i yega.
Xi Jinping a sigurá ku independientemente di e situashon internashonal China lo no bai kambia su polítika di amistat ku Cuba ni su boluntat di traha pa yuda e isla Caribeño.
E prioridat ta ne momentunan aki ta pa China yuda Cuba i esaki lo bai tuma luga tambe segun presidente Xi Jinping.
Miguel Díaz-Canel a splika ku tin un akuerdo komersial bilateral firma ku gobiernu di China pa un kantidat nobo di proyektonan di invershon ku lo kuminsá pronto na diferente parti di Cuba.