Mientras no sa  kén ta organisadó pa 2023: Gobièrnu ta boga pa Karnaval bira self support

WILLEMSTAD (D) – Karnaval di Kòrsou mester bira self support. Minister di enseñansa i kultura, Sithree van Heydoorn, ta spera ku den futuro Gobièrnu nos karnaval a desaroyá di tal forma ku e ta logra e meta aki. Lo bai dura un tempu pero ku esaki por bira realidat, pero mester kuminsa pensa den e direkshon aki. Den e kaso aki, asina e minister a sigi bisa, Karnaval mester funshona manera un negoshi i lo no ta nesesario mas pa gobièrnu hinka sèn aden.

Minister van Heydoorn, tin un reunion pendiente ku direktora di kultura, pa atendé e detayenan di karnaval otro aña. E intenshon ta pa huntu ku e organisashon di kultura, delibera riba e puntonan  puntonan fuerte i tambe esnan menos fuerte pa por determina  kon ta bai mehora nan, na  benifsisio di selebrashon di karnaval.

Anteriormente e Asosashon di Grupo di Karnaval, bou di guia di Henny Reinilia a indika ku por asumi ku ta AGKK ta organisa karnaval di otro aña. Segun e reakshon di Minister van Heydoorn pa awor aki, gobièrnu ta pendiente pa desishonnan ku mester tuma pa organisá karnaval 2023. No ta konosi ainda, ta ken lo bira e organisadó, e ministera a bisa.

Mester tin mihó komunikashon entre di AGKK i gobièrnu di Kòrsou, van Heydoorn ta bisa. Ademas no mester hasi partisipashonnan sin konsulta òf sin deliberá prome ku gobièrnu.

AGKK mester kompronde ku no ta e so ta  karnaval, pero ku gobièrnu i otro stakeholdernan tambe ta forma parti importante di karnaval, asina e minister a sigi bisa.

Mientrastantu segun minister van Heydoorn, AGKK a kompronde su punto di bista i tin un reunion pendiente ku e Asosashon di Gruponan di Karnaval.

Ta e intenshon pa entrante aña 2024, gobiernu apunta un organisashon ku ta organisa karnaval pa un temporada mas largu, por ehempel durante di kuater aña. E organisashon dje karnaval mester tuma luga segun kondishonnan ku gobièrnu ta stipula. Den kaso ku e organisashon no por kumpli ku e kondishonnan, gobièrnu lo kit a e responsabilidat for did je.