Mickel Martis, presidente di Trabou pa Kòrsou TPK ta vigilando Banko Sentral su metementu den koperativa ACU

WILLEMSTAD. Dos luna pasá pa medio di nos miembro orgániko Rines Martina, Trabou pa Kòrsou a saka un komunikado kaminda TPK a mustra ku transformashon ta posibel pa medio di koperativa.
Rònt mundu koperativa ta un medio ku a yuda ekonomia i e parti sosial di paisnan drecha.
Na Kòrsou tambe nos mester hasi esaki.
Dos siman pasá sr. Rennox Calmes tabata na Chile representando Kòrsou den Parlatino, kaminda WHO (World Health Organization) a presentá un lista largu di kuantu koperativa tin na mundu.
Por ehèmpel na ‘Cooperativas de las Americas’ tin 72 mil koperativa, 2 mion hende a haña trabou i un total di 445 mion sosio. Den e sifranan aki no tin Oropa.
Den e sifranan aki tin e koperativanan di Kòrsou tambe.

METEMENTU DI
BANKO SENTRAL
Trabou pa Kòrsou a bin ta tuma nota riba e forma kon Banko Sentral a bin ta atendé i mete den e koperativa di mas grandi di Kòrsou ku ta ACU.
Den parlamento dia Banko Sentral tabatei den sala, Calmes a bisa nan ku e lo bini bèk riba e forma ku nan a bin ta atendé ku koperativanan financiero i ta purba kambia statutonan pa dominá i kita e forsa for di sosionan.
TPK sa ku pa hopi tempu Banko Sentral a bin ta purba drenta den koperativa ACU.
Ku pader Römer di Jandoret tabata na bida, e kos aki no por ta pasando.
TPK a entregá un lei pa aliviá koperativanan un tiki for di impuesto, pero ku na mes momentu ta obligá e koperativa invertí e alivio aki den formashon di su sosionan. E lei aki ta kanando su kamindanan por medio di Hunta di Konseho (‘Raad van Advies’). TPK no ta bai mete den e asuntu, pero si ta vigilá kiko Banko Sentral ta hasiendo. Banko Sentral mester korda ku koperativa ACU no ta un banko i ku eiden ta sosionan ta disidí paso ta sosionan ta doño. Banko Sentral mester respetá esaki.