Mester mantené posishon independiente di Kòrsou i Sint Maarten

WILLEMSTAD – Den kuadro di implementashon di e lei i maksimalisashon di salarionan altu, Banko Sentral Komun di Kòrsou i Sint Maarten, ta insisti ku no tin distinshon, pa e dos paisnan. Pasobra banko sentral tin un filial na Sint Maarten tambe, kaminda e hendenan tin un otro stipulashon di salario i òf otro renumerashon.
Si esaki no tuma luga, por surgi un desbalansa den e struktura salarial den su totalidat pa e personal. Julian Lopez Ramirez, di Banko Sentral a splika parlamento ku ora ku a presenta e lei, originalmente na parlamento, e posishon speshal pa Banko Sentral, tabata inklui den e lei. Ta despues a sake, pero no ta konosi pa Banko Sentral, kiko e motibu ta. Na varios okashon Banko Sentral tambe a konseha pa tene kuenta spesifikamente ku e posishon di banko Sentral, di Sint Maarten i Kòrsou. Esaki pa no tin e diferensia entre e prosedura aki i e stipulashonnan di norma aki na Kòrsou i esnan na Sint Maarten.
Banko Sentral tambe ke referi na Ministerio Publiko i Korte Komun ku tambe ta un organisashon ku ta kubri mas pais outonomo den reino. Kaminda ku si, korektamente na opinion di representantenan di Banko Sentral, a sake for di e norma di un pais so, hustamente pa perkura ku nos tin dos norma ku ta konta pa dos instituto.
E otro punto dikon Banko Sentral ta kere ku pe sigur tin mester tin un tiki atenshon, spesifiko, ta ku mester garantisa e posishon independiente di e instituto, tantu na Kòrsou komo na Sint Maarten. Esei no ta nifika ku e banko no ta kere ku mester tin norma pa gerensia i empleadonan di Banko Sentral. ‘Nos ta haña ku un norma mester konta pa Banko Sentral.’E uniko kos ta segun Lopez Ramirez, ku e mester ta un norma ku ta konta tantu na Sint Maarten komo na Kòrsou. I hustamente esei Banko Sentral di Korsou ta konstata, ku e no ta faktibel pa hinke den un lei , sin ku tin konsulta konhuntu ku e otro pais kaminda ku e instituto ta eherse su tareanan.
E prinsipio di independensia di un instituto ta konta pa ront mundu, ku ta soru pa un Banko Sentral tin un posishon kompletamente independiente, naturalmente denter di normanan di e pais. Banda di esei, segun Lopez Ramirez, e kompensashon ta importante pa por atrae funshonarionan kapasitá ku ta relativamente skars i asina fortifiká e posishon independiente tambe.
En general, relashona ku e lei ku aktualmente ta na Parlamento, Banko Sentral ta kere ku e norma tin un karakter muchu general. E konsepto di lei no ta brinda espasio pa diversividat den e stipulashon i norma, mientras ku na Hulanda i Aruba i aparentemente na Sint Maarten esei tambe lo ta e kaso.
Ademas e lei no ta tene sufisiente konsiderashon, na opinion di representantenan di Banko Sentral, ku e asina yama ‘’eerbiedigende werking’, si tene kuenta ku esei pa e hendenan ku tin diferente kontrato kaba, na nos pareser, e aplikashon di artikulo 54 di e proposishon no tin masha validez. Mirando ku esei ta sali for di e punto di bahada di e salario ministerial ku tambe ta stipula ku pa medio di 2023 mester adapte atrobe. Pues aworaki, segun Lopez Ramirez ta diskuti un norma ku ta basa riba un montante ku ta bai konta temporalmente so.