Mester kobra é mal pagadónan di belasting !

WILLEMSTAD- Minister di Finansas, Javier Silvania no ta sigi e konseho di CFT pa oumentá tarifa di belasting. Silvania a splika ayera den reunion di Parlamento ku tin un grupo basta grandi den nos komunidat ku no ta paga belasting manera mester ta. Minister Javier Silvania di Finansas, ta splika ku ta pesei ora ku ela asumi e puesto di minister, ela introdusí e proyekto di compliance. Esaki ta nifika ku mester kobra tur e hendenan ku no ta paga. ‘’Bai kobra tur e mal pagadónan, pa e sèn drenta den kaha di gobièrnu’’.
Ta pesei konsientemente minister Silvania no ta sigi e konseho di CFT pa subi belasting pasobra esei lo perhudiká e bon e pagadónan. ‘Mi ta sòru pa nos modernisá i drecha servisio di impuesto pa nos por kobra tur e hendenan ku tur tempu no a paga’’. Den e kuadro aki, minister Silvania a menshoná e asina yamá ‘’heilige huisjesnan’’, ku ta e adrèsnan kaminda ku no tin mag di bai kobra. Ta ei tin miones di florin i ta einan gobièrnu ta kobrando, e minister a sigi bisa.
Mas aleu Silvania a bisa ku pueblo di Korsou por ripara ku tur luna ora ku publika den e reportaje di Belastingdienst,tur luna gobièrnu ta kibra entrada . Gobiernu ta risibi mas tantu mas tantu na impuesto, ku lok ela presupuesta. Banda di esei, ta drenta mas tantu sen na belasting, ku prome ku Covid-19. Esei ta bisa algu, e mandatario a remarka.
KONSEHO DI CFT
Minister Silvania a resumi tambe ku ora ku ela bira minister i introdusi e proyekto di compliance, ni CFT no a kere den e proyekto. Tabata nesesario pa e minister reuni varios bia ku CFT, pa konvense ku realmente Korsou por kobra mas sen di belasting i ku en realidat tin hopi sen ta sirkula na Korsou. Mientrastantu CFT no por kere ku strukturalmente entradanan ta oumenta. Pero tur luna gobièrnu ta sigi mustra CFT ku entradanan ta keda subi mas tantu ku loke a pronostika.
Gobiernu ta sigi e bon konsehonan di CFT, pero no ta asina ku e minister mester di aprobashon di CFT, minister Silvania ta splika. ‘’Gobiernu ta stipula su maneho i ta disidí si e ke baha accijns riba gasoline. CFT ta duna konseho, mi ta hasi bon uso dje konseho, pero si mi no ta di akuerdo ku e konseho, na un manera korekto mi ta informa dikon mi no ta sigi e konseho ei’’. Di e forma aki e minister ke mustra bon klá, ku den e kaso di belasting, e no ta subi tarifa di belasting, manera CFT a proponé.