Mester inklui kultura den plannan di kalamidat

WILLEMSTAD. Minister Van Heydoorn a enfatisá ku ta importante pa inkluí kultura den nos plannan di kalamidat, pasobra kultura no ta solamente un produkto ku nos por mustra nos bishitantenan òf un sentido di orguyo ku nos tin den ken nos ta. E ta un fuente di sobrevivensia, fuente di entrada, un manera pa regla nos relashonnan ku otro, un sistema di promové biodiversidat i sigurá ku nos rekursonan natural ta keda konservá i uzá na manera efikas. Richenel Ansano (antropólogo i fasilitadó internashonal pa UNESCO) ku ta e persona ku ta guiando e proseso di konsultanan i workshops den su presentashon a para ketu riba e importansia pa integrá redukshon di riesgo di kalamidat den inventarisashon di Herensia Kultural Intangibel. Ansano a sigui bisa ku e partisipantenan ta bai siña kon hasi inventarisashon di Herensia Kultural Intangibel den kuadro di emergensia i kalamidat. Tambe el a trese dilanti ku pais mester ta konsiente ku kalamidat no ta kuminsá ni kaba na frontera di nos isla, e ta bai mas leu ku esei. Dr. Albert Martis (METEO) na su turno a para ketu na e vishon ku ta bisa ku pa 2030 pais lo ta resiliente pa impaktonan di peligernan di naturalesa, pèrdida di nos biodiversidat i un aktor klave den energia alternativo. Mishon di e Plataforma ta unu kaminda lo usa konosementu relashoná ku e impaktonan di kambio di klima pa formulá strategianan di adaptashon i mitigashon