Mester atendé tambe ku tur otro kasonan ilegal (Part 2)

Mi a konsiderá pa awe 13 sèptèmber 2021, bolbe publiká e komunikado aki ku mi a publiká for di 9-11-2020. Esaki pa mi mustra ku e último susesonan ku a tuma lugá na Marnix College ta konsekuensha di e anarkía ku ta tumando lugá riba nivelnan haltu den nos komunidat, hasta den seno di gobernashon.
Quote: “E drama di aktonan ilegal dor di entre otro gobièrnu, ministernan, organisashonnan semi-gubernamental i gobernador ta sigui tuma lugá. Hinter e diskushon entorno e konstrukshon di e rampa na Playa Kenepa ta un otro ehèmpel. Esunnan ku ta sigui medionan di komunikashon por a tuma nota, ku for di hopi aña kaba mi persona a kuestioná algun di e aktonan ku a tuma lugá ku mi a denominá komo ilegal.
Entre otro e kobramentu di ‘lekverlies’ eksorbitante dor di Aqualectra pa años, aktuashon di Parlamentarionan i gobernador durante e susesonan despues di a disolvé Parlamento na 2012.
Tambe mi a hiba un lucha solitario for di 2015 kontra e ponementu ilegal di ‘community mailboxes’. Tambe mi a agitá fuertemente ku prueba kontra e hecho ku gobernador a violá artíkulo 45 insiso f, di nos Konstitushon ora ku na 2017 e a huramentá ministernan alabes komo parlamentario.
Na diferente okashon mi a keda pone atenshon riba esakinan via medionan di komunikashon. Mi a manda un petishon pa Ministerio Públiko pa kuminsá ku un investigashon kontra e minister VVRP i otronan, ku ta C-Post i Bureau Telecommunicatie Post en Utiliteiten.
Te awe mi no a risibí reakshon di Ministerio Públiko. Tur esnan ku tabatin e deber di kuestioná e lokenan mi tabata kuestionando a keda ketu.

“WHITE COLLAR ANARCHY”
Den un komunikado via medionan di komunikashon mi a denominá tur e asuntunan ei komo ‘white collar anarchy’ esta anarkía di hendenan ku kòl ku dashi. Ta atendé ku e hòmber chikí pero nò esnan ku mi a menshoná ariba.
Ta straña mi ku awor aki den e kaso di rampa na Playa Kenepa yen di hende ta sali bati bleki, ke bai korte ets ets.
Ta opvio ku e asuntu a bira unu polítiko. Aunke e asuntu di rampa (na playa) ta unu noble na interes di nos hendenan ménos movibel, tòg mester atendé ku e parti ku a bai di un manera ilegal, dor di un departamentu di gobièrnu i tambe CTDB ku ta un organisashon semi gubernamental.
Mi no a opta pa kuminsá un kaso den korte riba e asuntu di C-Post pa motibu ku na sèptèmber 2016 minister di VVRP a kambia e dekreto ministerial di 2012 dunando C-Post un base legal pa por a sigui pone e ‘community mailboxes’.
No obstante esaki ponementu di e ‘community mailboxes’ prome ku e minister a kambia e dekreto tabata ilegal. Dor ku e minister a koperá ku esaki e tambe a kometé un akto ilegal a base di nos kódigo penal. Ta pesei e minister a laga e dekreto nobo kuminsá konta for di 2012.
Un ke otro pa purba eliminá e aktonan ilegal ku nan a kometé.
Mi a splika na diferente okashon ku peritonan di lei ta kuestioná ora pasa sierto leinan ku forsa retroaktivo. [ ………………… ]

ATROPEYO DI NOS LEINAN
Mi ta spera ku parlamentarionan, polítikonan, medionan di komunikashon i otronan kuminsá kuestioná tur e kasonan ku mi a menshoná ariba. Si esaki no tuma lugá nan lo keda atropeyá nos leinan.
Un biaha mas mi ta hasi un yamada riba mesun instanshanan ku mi a menshoná, pa pone preshon pa drecha e fayonan den nos konstitushon ku ta nos lei madre”. Unquote:
Ainda tin basta aktonan kontroversial ku a tuma lugá ku mi no a menshoná. Ki a para di e enkuesta Parlamentario ku a inisiá entorno Servisio di Seguridat di Kòrsou? Kon a para ku e rapòrt di wes Willems riba e 200 mion ku a disparsé?
(Felix D. Pinedo)