Mester a para reunion ku KEM a pidi: Staten no a haña dokumento pa reuni riba FKP

WILLEMSTAD. Sin ke pensa malu pero mas bien pensa ku ta koinsidensia ku ya ta algun biaha ku ora e frakshon di KEM den parlamento hasi un petishon of kolaborashon pa un punto di agènda, no ta kumpli ku e deseo manera e promé biaha ku Lo Martines a pidi koperashon pa yama un reunion i su koleganan a lag’e na kaya.
Durante reunion e siman aki tambe ela pidi presidente pa kambia un punto di agènda pero no a haña voto nesesario pa presidente kumpli ku su petishon.
I awor ta sosode ku ela pidi reunion pa deliberá ku direktornan i huntanan di komisario di Fundashon Kas Popular i Fundashon Fiansa Popular, griffier ta laga konvoká reunion ofisial di komishon sentral pa anulá esaki na ultimo momento te un proksimo aviso.
Proksimo aviso por ta aki seis luna of un aña tambe dependé si tin espasio entre e kantidat di reunionnan ku e parlamento aki tin programá pa atende tur e puntonan ku e anterior parlamento kontrolá pa PAR/MAN a laga para.
E intenshon tabata pa papia riba e maneho general, maneho di mantenshon i situashon finansiero di Fundashon Kas Popular. Reportadamente e dokumentonan ku a manda pidi FKP no a yega of no a yega kompleto pero en todo kaso a para e reunion.
No kabe duda ku Lo Martines lo a prepará su mes debidamente pa e tema aki konsiderando ku e ta un tema favorito di su kolaborador i mentòr politiko Nini Godett pero lástimamente e reunion no por a sigi.

Di otro banda NOBO a kompronde ku direktiva i komisarionan dje dos fundashonnan aki ta debidamente prepará pa enfrentá kualke debate pasobra mayoria di temanan lo tin di haber ku relatonan ku ta sali den korant di klientenan malkontentu ku hasta ta hiba FKP Korte pero ta pèrd’é 90% di e kasonan.
En todo kaso no ta resta e lider di frakshon di KEM otro sino di keda pendiente pa e dokumentonan yega pa e miembronan por studia esakinan i atendé e punto aki ku e importansia ku e ta meresé.