MENSAHE FOR DI KONFERENSIA DI KLERO 2021

Na tur fiel katóliko,
na tur hende di bon boluntat
di e seis isla ku ta forma Diósesis di Willemstad.

Rumannan,
Pas sea ku boso.

Nos a kaba di konkluí nos konferensia di klero 2021. Obispu, saserdote i diákononan a kompartí ku hopi interes i dedikashon e tema ku tin komo título: Na kaminda pa Sínodo 2021-2023: Komunion, Partisipashon i Mishon.
Nos ta konsiente ku mundu i Iglesia ta pasando tempunan difísil, pero nos ta realisá ku esaki ta un momentu di grasia i di promesa. Papa Francisco a yama nos pa uni riba e kaminda di un “Iglesia sinodal”, un Iglesia ku ta kana huntu, kompañá i guiá pa Hesus Resusitá ku ta splika nos e Santa Skritura i ta parti pa nos e pan di Eukaristia (cf. Lk 24: 26ss).

Den e Konferensia nos a siña importansia di diálogo i komunikashon pa nos konosé otro i kana huntu ku otro. Pa logra esei nos tin mester di uni den orashon i alabansa, den adorashon i silensio pa skucha e bos di Señor. Esaki lo duna nos e forsa nesesario pa anunsiá Hesukristu, pa e Bon Notisia di salbashon yega na tur hende den tur skina di nos Diósesis. Partikularmente nos a mira e importansia di aserká esnan ku ta biba marginá, esnan ku no ta ser skuchá, esnan oprimí. Tambe nos ke aserká esnan ku ta ofresé un kontribushon generoso na nos sosiedat den e sektor empresarial, esnan ku ta generá empleonan digno pa tur habitante di nos islanan. Den un palabra, nos ke aserká tur hende di bon boluntat pa skucha i dialogá ku tur esnan ku ke bisa nos kon nan a mira i sinti Iglesia den nan bida.
E invitashon ta bai na tur nos rumannan di e seis islanan ku ta forma parti di nos Obispado di Willemstad: Aruba, Boneiru, Kòrsou, Sint Maarten, Saba i Sint Eustatius. Nos ke skucha, diserní i konsultá, ku grasia di Spiritu Santu, loke boso ta opiná riba e pregunta: “Na ki tipo di Iglesia bo ta pertenesé awor?”

Rumannan, mi ta animá boso pa kana e kaminda pa un “Iglesia sinodal” p’asina, manera Papa Francisco ta bisa, “Nos tur skuchando otro; i tur skuchando e bos di Spiritu Santu”.
Laga nos pidi La Bírgen Maria, Mama di Iglesia, pa e bin kana huntu ku nos pa uni den komunion ku Dios Tata i su Yu Hesukristu. “Ven con nosotros a caminar, Santa Maria, ven!”.
Ku grasia di nos Señor Hesukristu, amor di Dios Tata i komunion di Spiritu Santu kompaña boso tur.

Willemstad, 22 òktober 2021
+ Luis A. Secco, SDB
Obispu di Willemstad.