Medidanan di Gobiernu a kousa masha problema na SVB

WILLEMSTAD – Personal di SVB awe mainta a kanta wèlga, pasobra nan ta kontra dje medidanan ku gerensia di SVB a tuma ku ta relashona ku nan kondishonnan di trabou. Gerensia di SVB a partisipá su trahadónan ku independiente di e sifra di índise pa anja 2021 i 2022, no ta indèksá e salarionan di personal di SVB. Ademas no ta otorga oumento di salario na personal ku a haña un evaluashon positivo pa anja 2021 i 2022. Tambe e karta firmá pa direktor Philip Martis, 16 di mei 2022, ta menshoná ku ta suspendé pago di kompensashon pa fakashon pa aña 2022 i 2023. Gregory Wilson, di direktiva di ABVO a bisa awe mainta na e trahadonan di SVB ku e sindikato ta konstatá ku no tin espasio pa papia i ku mas bien ta partisipashon, gerensia di SVB ta duna. Segun Wilson, si akaso mester tuma medida, sikiera gerensia mester bai serka e sindikato ku mester notifika e trahadonan pa por negosha kiko por i no por. Wilson a bisa e personal den akshon na SVB, ku e sindikato ke tende kiko nan ta opiná, pa sa kon mester delibera ku gerensia di SVB.

VVU
E karta ta menshona tambe ku debi na e difikultatnan finansiero di SVB, no por bai di akuerdo ku e lei ku ta regla retiro boluntario (Landsverordering vervroegd vrijwillige uitstroom, VVU P.B. 2021. N0. 65). Ademas e ordenansa di lei aki no ta eliminá e redukshon di 6% pa un persona ku baha ku penshun prematuro. ‘Kumplimentu ku lei na e momentu aki ta implika mas gastu pa SVB riba termino kòrtiku’. Philip Martis ta splika,ku manera gerensia a informá anteriormente, e resultadonan finansiero di SVB no ta faborabel. E krísis finansiero i sosial-ekonomiko na Kòrsou tin konsekuensianan drástiko pa finansas di SVB. Banda di esaki gobiernu a disidi dia 30 di juli 2021 ku SVB mester redusí 9.2 mion (23%) riba su gastunan operashonal.
Esaki ta ensera ku banda di e medidanan ku a tuma kaba, (manera suspenshon di indeksashon, oumento periodiko i plaka di fakansi) mester tuma mas medida pa por realisá e ekonomisashon ku gobièrnu a indiká.
Esaki ta inklui prinsipalmente redukshon di personal via penshun. Komo konsekuensia di esaki, gerensia di SVB ta obligá pa mantene e medidanan di ekonomisashon den e kondishonnan laboral di personal pa anjanan 2022 i 2023.

SOLIDARIO
E presidente di Grupo di Servisio di SVB, ta kontra ku ta personal di SVB so mester karga e konsekuensianan dje malester ekonomiko di Kòrsou. E ta pidi pa respeta derecho dje trahadonan. Si gerensia ke papia, e mester hasie ku ABVO, Grupo di Servisio i tur personal ku ta den akshon. Asina e presidente di e grupo di Servisio a bisa awe mainta. No mester ta asina ku personal di SVB mester ta solidario ku trahadonan pafo di SVB, paso e pregunta ta ken ta solidario ku nan.
Gerensia di SVB ta konsiente di e implikashonnan di e medidanan pero no por hasi otro bou di e sirkumstansianan finansiero aktual. Philip Martis ta finalisá e karta, indikando ku gerensia ta konta ku koperashon dje personal di SVB i ta konfia ku huntu lo sigi sirbi e komunidat ku mesun profeshonalismo i dedikashon pa salbaguardiá mas tantu kupo di trabou posibel i ku konhuntamente lo surpasá e tempunan dífisil.
ABVO ta hiba e kaso korte. I trahadonan a reanudá trabou.