MCB ta entregá prestigioso MCB Prize 2022 na Sandals Royal Curaçao

Willemstad – Na final di tur aña MCB ta entregá e asina yamá MCB Prize. E aña aki no ta diferente i resientemente MCB a hasi entrega di e di 26 MCB Prize. Na e okashon aki sr. Chicu Capriles a trese lo siguiente dilanti:
“E rekonosementu akí a bira un tradishon i selebrashon tur aña pa nos Banko, kaminda nos ta rekonosé un persona, evento, organisashon òf kompania ku na nos humilde opinion a sobresalí i a hasi un kontribushon positivo na nos komunidat i/òf nos ekonomia durante e aña akí.
P’e motibu aki ta pa’mi un honor i plaser pa anunsiá ku e ganadó di MCB Prize 2022 ta: Sandals Royal Curaçao.
Sandals ta un kadena di Resort luhoso di 5 strea ku a keda fundá 40 aña pasá riba e bunita isla di Jamaica dor di famia Stewart i su fundador sr. Gordon “Butch” Stewart di felis memoria. Aktualmente maneho di Sandals ta bou di enkargo di sr. Adam Stewart, yu di e fundador.

Dia promé di yüni 2022, Sandals a habri su All-inclusive Resort di mas nobo, ku 350 kamber, aki na Kòrsou. E area espektakular di Santa Barbara a bira e di 16 Resort mundialmente i e di 9 destinashon di Sandals den Karibe.
E konsiderashon primordial pa entregá MCB Prize 2022 na Sandals ta basá riba loke nos ta yama e ‘Efekto di Sandals’ (The Sandals’ effect). Tin tres komponente determinante di e efekto akí:

Sandals Effect # 1
Apesar di su invershon signifikante pa realsá e propiedat anteriormente di Hyatt i Santa Barbara, Sandals a krea tambe oportunidatnan direkto i indirekto di empleo, ku a resultá den un efekto makro-ekonómiko signifikante i sostenibel pa nos isla.
Sandals Effect # 2
Yegada di Sandals a subi e nivel lokal den area di kalidat i espektativa di hospitalidat i a yuda hiba nos Dushi Kòrsou riba un spit aun más rápido komo un destinashon turístiko serio i ekslusivo.
Sandals Effect # 3
E kantidat total di bishitante, spesialmente for di Merka pa nos isla, a oumentá di forma rápido i drástiko for di dia ku Sandals a habri. E bishitantenan asta ta haña akseso na un Mini Cooper, kual nos sa mira tin biaha pará dilanti nos Banko.
I nos no por keda sin menshoná i rekonosé e aktividatnan realmente bondadoso i generoso di e Fundashon karitatativo di Sandals (Sandals’ Foundation) den henter nos komunidat.

Nos ta sumamente orguyoso i gradesido pa e kontribushonnan positivo di Sandals na nos isla, i pa e kompromiso ku nan a establesé i demostrá pa yuda hasi Kòrsou un lugá “Where Amazing Comes Together” (kaminda kosnan espektakular ta bini huntu), kual ta netamente Sandals su lema eksitoso i fásil pa kòrda.

Nos ta konvensí ku Sandals Royal Resort lo krese, floresé i trese mas turista, trahadonan dediká i hopi prosperidat pa nos dushi Kòrsou pa hopi aña mas.

“Na nòmber di nos tur na MCB, nos ta felisitá boso komo ganadó di nos MCB Prize 2022.
Masha pabien!”